Inflation : नवीन वर्षात महागाई नाही खाणार जीव, EMI ही गेअर बदलणार..
Inflation : नवीन वर्षात महागाईचा सूर नरमणार असल्याचा अंदाज तज्ज्ञ व्यक्त करत आहेत..
नवी दिल्ली : नवीन वर्ष, 2023 यायला फारसा अवधी उरला नाही. नवीन वर्ष सर्वसामान्यांना दिलासा देणारं आहे. महागाईच्या (Inflation) आघाडीवर मोठा दिलासा मिळणार आहे. नवीन वर्षात महागाई कमी होण्याची शक्यता आहे. जागतिक बँकेचे (World Bank) अर्थतज्ज्ञ ध्रुव शर्मा यांच्या मते, किरकोळ महागाईचा दर पुढील आर्थिक वर्षात (Fiscal Year) 2023-24 मध्ये घटेल. महागाई दर कमी होऊन तो 5.1 टक्के होऊ शकतो. त्यामुळे सर्वसामान्यांची महाग ईएमआयपासून (EMI) सूटका होऊ शकते.
महागाई दर घसरल्याचा फायदा ग्राहकांना मिळेल. आरबीआयच्या पतधोरणाच्या मर्यादेत म्हणजे 2 ते 6 टक्क्यांच्या घरात महागाई दर असेल. खाद्यान्न आणि जीवनावश्यक वस्तूंच्या वाढत्या किंमतींमुळे महागाई उच्चांकी पातळीवर पोहचली आहे. सध्या ऑक्टोबर महिन्याचे जे आकडे आले आहे, त्यानुसार, किरकोळ महागाईचा दर 6.7 टक्के आहे.
एप्रिल 2022 मध्ये किरकोळ महागाई दर 7.79 टक्क्यांवर पोहचला आहे. त्यानंतर RBI ने सलग व्याज दर वाढविला आहे. सलग चार पतधोरण समितीच्या बैठकांमध्ये हा दर वाढलेला आहे. आरबीआय रेपो दर 4 टक्क्यांहून 5.90 टक्क्यांवर पोहचला आहे.
रेपो दरातील वाढीमुले बँकांचे गृहकर्ज आणि इतर कर्जावरील व्याज दर वाढले आहेत. गृहकर्ज ग्राहकांच्या ईएमआयमध्ये तर आणखी वाढ झाली आहे. महागाईने मेटाकुटीला आलेल्या कर्जदारांना ईएमआय वाढल्याने मनस्ताप सहन करावा लागला.
वाढत्या ईएमआयमुळे ग्राहकांना मोठा झटका बसला. त्यांचे बजेट कोलमडले. पण आता जागतिक बँकेच्या अंदाजानुसार, महागाई कमी होऊन ती 5.1 टक्क्यांवर येऊ शकते. त्यामुळे रेपो दराच्या वाढीला ब्रेक लागेल. रेपो रेटमध्ये कपातीची शक्यता आहे. त्यामुळे ईएमआय कमी होईल.
RBI चे गर्व्हनर शक्तिकांत दास यांनी पुढील वर्षी महागाई कमी होण्याचा दावा केला होता. अर्थमंत्री निर्मला सीतारमण यांनी ही पुढील वर्षी महागाई कमी होण्याचे संकेत दिले आहे. 7 डिसेंबर रोजी आरबीआय रेपो दराविषयी निर्णय घेईल. त्याआधारे महागाईच्या आघाडीवर आरबीआयचे धोरण स्पष्ट होईल.
