शेअर बाजारातील सर्वात मोठ्या IPO ची तयारी! ब्लॅकरॉकपासून LIC पर्यंत दिग्गजांची नजर; जिओ IPO चा प्राइस बँड किती?

जिओ प्लॅटफॉर्म्सच्या आयपीओबाबत एक मोठी बातमी समोर आली आहे. जिओ कंपनीने आयपीओसाठी किंमत श्रेणी जाहीर केली आहे. जिओ प्लॅटफॉर्म्सने आपल्या शेअर्सची किंमत ₹१,०६५ ते ₹१,११९ दरम्यान ठेवली आहे. यामुळे जिओच्या आयपीओने प्रमुख गुंतवणूकदारांमध्ये आधीच लक्षणीय उत्सुकता निर्माण केली आहे. आयपीओ सुरू होण्यापूर्वीच प्रमुख गुंतवणूकदारांनी अंदाजे २.५ लाख कोटी रुपयांची गुंतवणूक करण्याची इच्छा दर्शवली आहे. यामध्ये जागतिक कंपन्यांचा समावेश आहे.

मुकेश अंबानी यांच्या नेतृत्वाखालील रिलायन्स इंडस्ट्रीजची डिजिटल आणि टेलिकॉम शाखा, जिओ प्लॅटफॉर्म्स, भारतीय शेअर बाजाराच्या इतिहासातील सर्वात मोठा प्रारंभिक सार्वजनिक प्रस्ताव आणत आहे. ₹३०,१८८ कोटी मूल्याच्या या मेगा-इश्यूसाठी जगभरातील प्रमुख संस्थात्मक गुंतवणूकदारांकडून मोठी स्पर्धा निर्माण झाली आहे. ब्लॅकरॉक, अलियान्झ आणि नॉर्वेच्या सॉवरेन वेल्थ फंडासारख्या जागतिक वित्तीय दिग्गजांनी अँकर बुकमध्ये रस दाखवला आहे. तसेच काही बाहेरील देशांमधील कंपन्याची या शर्यतीत उतरल्या आहेत.

मिळालेल्या माहितीनुसार, सिंगापूर, नॉर्वे, अबू धाबी आणि कतार येथील सरकारी निधी तसेच भारत आणि जगभरातील प्रमुख गुंतवणूकदारांचा समावेश आहे. गुंतवणूकदारांच्या यादीत गव्हर्नमेंट ऑफ सिंगापूर इन्व्हेस्टमेंट कॉर्पोरेशन (जीआयसी ), फिडेलिटी, नॉर्वेचा गव्हर्नमेंट पेन्शन फंड ग्लोबल, न्यू वर्ल्ड फंड इंक. आणि स्मॉलकॅप वर्ल्ड फंड इंक. यांचा समावेश आहे. देशांतर्गत पातळीवर, भारतीय आयुर्विमा महामंडळ (एलआयसी ), एसबीआय म्युच्युअल फंड, आयसीआयसीआय प्रुडेन्शियल म्युच्युअल फंड, एचडीएफसी म्युच्युअल फंड आणि कोटक महिंद्रा म्युच्युअल फंड यांसारखी मोठी नावे आपली गुंतवणूक करण्याच्या तयारीत आहेत.

कंपनीने या आयपीओसाठी प्रति शेअर १,०६५ रुपये ते १,११९ रुपये असा किंमत पट्टा निश्चित केला आहे. गुंतवणूकदारांना किमान १२ शेअर्सच्या लॉटसाठी बोली लावावी लागेल. त्यानंतर केवळ १२ च्या पटीतच अर्ज करता येतील. कर्मचारी आरक्षण कोट्याअंतर्गत अर्ज करणाऱ्या पात्र कर्मचाऱ्यांना प्रति शेअर ५४ रुपयांची सूट दिली जाईल.

भारतीय गुंतवणूकदारांमध्ये एलआयसी, एसबीआय एमएफ आणि एचडीएफसी एमएफ यांसारख्या प्रमुख नावांचा समावेश आहे. याव्यतिरिक्त देशातील अव्वल १० म्युच्युअल फंड आणि अव्वल ५ विमा कंपन्यांनाही जिओच्या आयपीओमध्ये रस आहे. या आयपीओसाठी मोठ्या संस्थात्मक गुंतवणूकदारांचा सहभाग महत्त्वपूर्ण मानला जात आहे. जिओचा आयपीओ २१ ऑक्टोबरला सुरू होईल आणि २३ ऑक्टोबरला बंद होईल. गुंतवणूकदारांना अर्ज करण्यासाठी फक्त तीन दिवसांचा अवधी मिळेल.