सॅम ऑल्टमन याची पुन्हा घरवापसी? आला OpenAI कंपनीच्या संचालक मंडळावर दबाव

नवी दिल्ली | 19 नोव्हेंबर 2023 : कृत्रिम बुद्धीमतेमुळे अनेकांच्या नोकऱ्या जाण्याची भीती जगभरात व्यक्त होत आहे. त्याला कारणीभूत OpenAI आणि तिची उपकंपनी ChatGPT ही कंपनी आहे. पण या कंपनीचा सीईओ सॅम ऑल्टमन यालाच कंपनीच्या संचालक मंडळाने बाहेरचा रस्ता दाखवला होता. त्यामुळे जगभरात खळबळ उडाली. लागलीच या कंपनीचा अध्यक्ष ग्रेग ब्रॉकमन याने पण पदावरुन पायउतार होण्याची घोषणा केली. हे दोघेही या नवतंत्रज्ञानाचे प्रणेते आहे. पण त्यांच्यावरच परागंदा होण्याची वेळ आली. आता कहाणीत पुन्हा ट्विस्ट आला आहे. सॅम ऑल्टमन याला पुन्हा सीईओ करण्यासाठी गुंतवणूकदारांनी संचालक मंडळावर दबाव आणला आहे.

असा घडला घटनाक्रम

चॅटजीपीटीचे सीईओ आणि सहसंस्थापक सॅम ऑल्टमन यांच्यावर ओपनएआय कंपनीचे संचालक मंडळ नाराज होते. त्याच्यावर भरवसा उरला नसल्याचे कारण त्यांनी दिले. तो अनेक निर्णयात लक्ष देत नसल्याचे खापर संचालक मंडळाने फोडले होते. याविषयीचे निवदेन प्रसिद्ध करत त्याची हकालपट्टी करण्यात आली. तर ओपनएआयचे अध्यक्ष ग्रेग ब्रॉकमन यांनी बोर्डाचे अध्यक्षपद सोडणार असल्याचे जाहीर केले. ओपनआयला एकापाठोपाठ दोन झटके बसले.

तुमचा निर्णय फिरवा

सॅम याला परत माघारी बोलविण्यासाठी मोठं-मोठ्या गुंतवणूकदारांनी ओपनएआयच्या संचालक मंडळावर दबाव आणला आहे. Thrive Capital ही सर्वात मोठी गुंतवणूक फर्म आहे. या फर्मने तर संचालक मंडळाला निर्णय फिरवण्यास सांगितले आहे. त्यांनी सॅम ऑल्टमन याला पुन्हा पदावर बसविण्यासाठी दबाव टाकला आहे. Tiger Global Management या गुंतवणूकदार संस्थेने पण सॅमसाठी मोर्चेबांधणी सुरु केली आहे.

माघारी बोलवा अन्यथा परिणाम भोगा

यातील काही मोठे शेअरहोल्डर आक्रमक झाले आहे. त्यांना सॅम ऑल्टमन याला बाहेरचा रस्ता दाखविण्याचा निर्णय रुचला नाही. सॅमला तातडीने माघारी बोलवा. त्याला पुन्हा सीईओ करा, अन्यथा परिणाम भोगावे लागतील असा धमकीवजा इशाराच या तगड्या गुंतवणूकदारांनी ओपनएआय कंपनीच्या संचालक मंडळाला दिला आहे. मायक्रोसॉफ्टचे सीईओ सत्या नाडेला यांनी पण सॅम ऑल्टमन याची बाजू उचलून धरली आहे. संचालक मंडळावर हे प्रकरण चांगलेच शेकण्याची चिन्हं दिसत आहे. संचालक मंडळ काय निर्णय घेते याकडे सर्वांचे लक्ष लागले आहे.