Share Market : शेअर बाजाराची दिशा कंची? गुंतवणूकदारांची या आठवड्यात होईल का चांदी?

नवी दिल्ली : या आठवड्यात शेअर बाजारावर (Share Market) अनेक घडामोडींचा प्रभाव असेल. यामध्ये अमेरिकन फेडरल रिझर्व्ह (Federal Reserve) बँकेच्या पतधोरणाचा परिणाम दिसून येईल. महागाई (Inflation) आटोक्यात आणण्यासाठी अमेरिकेतील केंद्रीय बँक पुन्हा एकदा व्याजदर वाढवण्याची शक्यता आहे. तर भारतात औद्योगिक उत्पादन आणि किरकोळ महागाई दर सोमवारी जाहीर करण्यात येणार आहे. तर घाऊक महागाईचे आकडे येत्या बुधवारी जाहीर करण्यात येणार आहे. त्यावर बाजाराची दिशा ठरणार आहे.

स्वस्तिका इन्वेस्टमार्ट लिमिटेडचे संशोधन प्रमुख संतोष मीणा यांच्या दाव्यानुसार, पुढील आठवडा हा जागतिक घडामोडींसाठी महत्वपूर्ण आहे. या काळात अमेरिकन महागाईचे आकडे आणि अमेरिकन फेडरल रिझर्व्ह द्वारा व्याज दराचा आढावा घेण्यात येईल. त्यांच्या दाव्यानुसार, बाजाराच्या दृष्टीकोनातून ही महत्वपूर्ण घटना असेल.

मीणा यांच्या म्हणण्यानुसार, घरगुती आघाडीवर औद्योगिक उत्पादन (IIP) आणि किरकोळ महागाईचे आकडे 12 डिसेंबर रोजी प्राप्त होतील. घाऊक महागाईसंबंधीची आकडेवारी 14 डिसेंबर रोजी जाहीर होतील. याशिवाय चीनमधील बातम्यांचाही परिणाम बाजारावर दिसून येईल.

कच्चा तेलाच्या किंमती, त्यातील चढ-उतार तसेच डॉलर निर्देशांक, रुपयाची स्थिती या सर्वांचा परिणाम दिसून येईल. मीणा यांच्या मते, संस्थागत गुंतवणूकदारांवरही नजर राहील. गेल्या आठवड्यात विदेशी संस्थागत गुंतवणूकदारांनी (FII) विक्री सत्र आरंभिले होते.

गेल्या आठवड्यात FII ने विक्रीवर जोर दिला होता. त्यांनी बाजारात 4,305.97 कोटी रुपयांचे शेअर विक्री केले होते. गेल्या आठवड्यात भारतीय रिझर्व्ह बँकेने (RBI) महागाई आटोक्यात आणण्यासाठी रेपो दरात 0.35 टक्क्यांची वाढ केली होती.

जिओजीत फायनान्शिअल सर्व्हिसेचे संशोधन प्रमुख विनोद नायर यांनी सांगितले की, आरबीआयच्या अंदाजानुसार, पतधोरण समितीच्या अहवालानंतर रेपो दरात 0.35 टक्क्यांची वाढ करण्यात आली. तर येत्या फेब्रुवारी महिन्यातही यामध्ये वृद्धी होण्याची शक्यता आहे. रशियाच्या कच्चा तेलावर निर्बंध घातल्याने आंतरराष्ट्रीय बाजारात अस्थिरता आल्याचा दावा करण्यात येत आहे.

गेल्या आठवड्यात BSE Sensex 686.83 अंकांनी घसरला होता. शुक्रवारी सेन्सेक्स 62,181.67 वर तर राष्ट्रीय शेअर बाजार (NSE), निफ्टी 18,496.6 अंकावर बंद झाला होता. या आठवड्यात बाजार नवीन उच्चांक गाठतो की घसरतो याकडे गुंतवणूकदारांचे लक्ष असेल.