आरिफ अंकलने माझ्यासोबत…, स्कूल बस चालकाचे 4 वर्षांच्या मुलीसोबत दुष्कृत्य

लखनऊमधून एक धक्कादायक बातमी समोर आली आहे. इंदिरानगर येथील एका प्रतिष्ठित शाळेच्या बस चालकाने 4 वर्षांच्या चिमुकलीसोबत दुष्कृत्य केल्याची घटना समोर आली आहे. मोहम्मद आरिफ असे आरोपीचे नाव असून त्याच्यावर 4 वर्षांच्या मुलीवर शाळेत जाताना बलात्कार केल्याचा आरोप आहे. चिमुकलीने तिच्यासोबत घडलेला प्रसंग आईला सांगितला, त्यानंतर आईने शाळा व्यवस्थापनाकडे तक्रार केली, परंतु चालकावर कोणतीही कारवाई झाली नसल्याचे समोर आले आहे.

शाळेने कोणतीही कारवाई न केल्याने महिलेने इंदिरानगर पोलिस ठाण्यात धाव घेत व्हॅन चालक मोहम्मद आरिफ आणि शाळा व्यवस्थापक संदीप कुमार यांच्याविरुद्ध तक्रार दिली. यानंतर पोलिसांनी आरोपीला अटक केली आहे. आता पुढील तपास सुरु आहे.

समोर आलेल्या माहितीनुसार, एक महिला तिच्या चार वर्षांच्या मुलीसह इंदिरानगरमध्ये राहते. तिची मुलगी इंदिरानगरमधील एका प्रतिष्ठित शाळेत शिकते. शाळेने या मुलीसाठी स्कूल व्हॅनची व्यवस्था केलेली आहे. मात्र 14 जुलै रोजी दुपारी चिमुकली शाळेतून घरी आली तेव्हा ती खूप घाबरलेली होती. आईने तिला विचारताच तिने गुप्तांगात वेदना होत असल्याचे सांगितले.

मुलीच्या आईने तिला डॉक्टरकडे नेले, त्यावेळी चिमुकलीच्या गुप्तांगात जखमा असल्याचे समोर आले. यावेळी मुलीने तिच्या आईला सकाळी शाळेत जात असताना, मोहम्मद आरिफने तिच्याशी दुष्टकृत्य’ केल्याची माहिती दिली. या मुलीने म्हटले की, आरिफ अंकलने माझ्याशी घाणेरडे कृत्य केले. यावेळी ती व्हॅनमध्ये एकटी होती असंही मुलीने सांगितले, यामुळे आईला धक्का बसला.

आरोपीने दिली धमकी

आईने ताबडतोब शाळा प्रशासनाकडे तक्रार केली, मात्र तिची तक्रार गांभीर्याने घेतली गेली नाही. त्यानंतर आईने आरोपी चालक आरिफसोबत बोलली तेव्हा त्याने मुलीला गायब करण्याची धमकी दिली. मात्र या महिलेने पोलिसांत धाव घेतल्याने आता आरोपीला बेड्या ठोकण्यात आल्या आहेत.

मुलीला केली मारहाण

पोलिसांनी दिलेल्या माहितीनुसार, दुष्कृत्य करताने मुलीने प्रतिकार केला तेव्हा आरोपीने तिला मारहाण करत धमकी दिली. यामुळे मुलगी घाबरली होती, मात्र नंतर तिने आईला माहिती दिली. आरिफने यापूर्वीही इतर मुलींसोबत असे कृत्य केले असण्याचा संशय पोलिसांनी व्यक्त केला आहे.