तिला आराम करु द्या डिस्टर्ब करु नका सांगितले, दोन दिवसांनी दरवाजा उघडताच सर्वांनाच धक्का बसला
हॉटेलच्या काउंटरवर त्यांनी आमची मैत्रीण रूममध्ये झोपली आहे, तिला डिस्टर्ब करू नका असा निरोप दिला. मात्र हॉटेलचा रूम उघडल्यानंतर धक्कादायक सत्य उघडकीस आले.
जोधपूर : आजकाल मित्र-मैत्रिणींवरही विश्वास ठेवणे फार कठीण झाले आहे. कोण कधी आणि कुठे दगा देईल याचा भरवसा देता येणार नाही. मैत्रत्वातील विश्वास कधी जीवावर बेतेल, याचा नेम नसतो. नुकतीच उघडकीस आलेली एक धक्कादायक घटना मैत्रीवरचा विश्वास उडवत आहे. घटना राजस्थानच्या जोधपुरमधील आहे. हॉटेलच्या रूममध्ये एका मैत्रिणीची हत्या करून दोघे मित्र फरार झाले.
हॉटेलच्या काउंटरवर त्यांनी आमची मैत्रीण रूममध्ये झोपली आहे, तिला डिस्टर्ब करू नका असा निरोप दिला. मात्र हॉटेलचा रूम उघडल्यानंतर धक्कादायक सत्य उघडकीस आले. हॉटेलच्या रूममध्ये तरुणी फासावर लटकलेली आढळली. या घटनेने परिसरात प्रचंड खळबळ उडाली आहे.
नर्सिंगचे प्रशिक्षण घेत होती तरुणी
मृतावस्थेत सापडलेली तरुणी ही नर्सिंगचे प्रशिक्षण घेत होती. सुमन वैष्णोइ असे मृत्यू झालेल्या तरुणीचे नाव आहे. दोन दिवसांपासून तिच्याशी कुठलाही संपर्क होत नसल्यामुळे घरचे लोक काळजीत सापडले होते. त्यामुळे कुटुंबीयांनी तातडीने सुमन ही प्रशिक्षण घेत असलेल्या उमेद हॉस्पिटलमध्ये धाव घेतली.
घरच्यांनी मिसिंगची तक्रार दिली
मात्र तिथल्या नर्सिंग प्रशिक्षण केंद्रातही तिचा ठावठिकाणा नव्हता. त्यानंतर शोधाशोध सुरू होऊन तिच्या बेपत्ता होण्याची पोलिसांमध्ये तक्रार नोंदवण्यात आली. याचदरम्यान शहरातील सर्व हॉटेल्सची झाडाझडती घेण्यात आली.
हॉटेलच्या रुममध्ये मृतावस्थेत आढळली तरुणी
यावेळी पावटा येथील एका हॉटेलच्या रूमचा दरवाजा दोन दिवसांपासून बंद असल्याचे उघडकीस आले. पोलिसांदेखत रूमचा दरवाजा उघडण्यात आला, तेव्हा बेपत्ता सुमन ही त्या रूममध्ये गळफास घेतलेल्या अवस्थेत सापडली.
पोलिसांनी त्या तरुणीचा मृतदेह ताब्यात घेऊन शवविच्छेदनासाठी पाठवला. अधिक तपासादरम्यान हॉटेलच्या रूममधून दोन युवक दोन दिवसांपूर्वी येऊन गेले होते अशी माहिती पुढे आली. त्या आधारे पोलिसांनी दोन्ही तरुणांचा शोध घेणे सुरू केले आहे.
प्रथमदर्शनी आत्महत्येचा संशय
पोलिसांनी घटनास्थळी केलेल्या पंचनामानुसार तरुणीने आत्महत्या केल्याचा प्रथमदर्शनी अंदाज व्यक्त केला जात आहे. मात्र हॉटेलच्या संचालकांनी दिलेल्या जबाबवरून तरुणीच्या मृत्यूमागे त्या दोन तरुणांचा हात आहे का? याबाबत पोलीस अधिक तपास करीत आहेत.
