डोंबिवलीत धक्कादायक घटना, दारुसाठी पैसे आणि बसायला खुर्ची दिली नाही म्हणून सुरक्षारक्षकाला मारहाण

डोंबिवली : डोंबिवलीत गुन्हेगारीच्या घटना थांबण्याचे नावच घेत नाहीत. क्षुल्लक कारणातून मारहाण करणे, हत्या करणे अशा घटनांमुळे सांस्कृतिक शहराची आता गुन्हेगारी शहर अशी ओळख होत चालली आहे. अशीच एक घटना डोंबिवली कोपर रोडवर आज पुन्हा उघडकीस आली आहे. कोपर रोड परिसरातील पटेल आर मार्टच्या सिक्युरिटी गार्डला मारहाण केल्याची घटना घडली आहे. दारुसाठी पैसे दिले नाही, बसायला खुर्ची दिली नाही म्हणून तरुणाने सेक्युरिटी गार्डला दगडाने मारहाण केली. सर्व घटना सीसीटीव्हीत कैद झाली आहे. याप्रकरणी विष्णुनगर पोलिसात गुन्हा दाखल करण्यात आला आहे. पोलिसांनी आरोपीला अटक केली आहे.

काय आहे प्रकरण?

डोंबिवली पश्चिमेला शास्त्रीनगर हॉस्पिटलच्या परीसरात हा प्रकार घडला. पटेल आर्ट मार्ट या दुकानाचा सुरक्षारक्षक पाऊस असल्याने टेम्पोमध्ये झोपला होता. मध्यरात्री 2.50 च्या सुमारास हर्षद कुशाळकर हा तरुण या ठिकाणी आला. तो गार्डकडे दारू पिण्यासाठी पैसे आणि बसायला खुर्ची मागू लागला. मात्र गार्डने त्याला नकार दिला. याचा राग आल्याने हर्षदने त्याच्या डोक्यात दगड आणि पेव्हर ब्लॉक मारला. या घटनेत मुन्नीराम सहानी हा सिक्युरिटी गार्ड जखमी झाला आहे. हा सर्व प्रकार सीसीटीव्ही कॅमेरात कैद झाला आहे.

यासंदर्भात विष्णुनगर पोलिसात गुन्हा दाखल करत हर्षदला अटक केली आहे. हर्षद हा कोपरमधील सिद्धार्थ नगर झोपडपट्टीमध्ये राहतो. पुढील तपास पोलीस करत आहे. या घटनेमुळे परिसरात एकच खळबळ उडाली. गुन्हेगारी रोखण्यासाठी कठोर पावले उचलण्याची मागणी नागरिक करत आहेत. पोलीस पुढील कारवाई करत आहेत.