Dombivali Crime : वाढीव व्याजाचे आमिष दाखवत सेवानिवृत्त नागरिकाला गंडा, ‘एवढ्या’ लाखांचा गंडा
अधिक व्याजाचे आमिष दाखवत आणखी एकाची फसवणूक झाल्याचे उघडकीस आले आहे. दाम्पत्याने आणखी किती जणांची अशा प्रकारे फसवणूक केली याबाबत पोलीस चौकशी करत आहेत.
डोंबिवली / 15 ऑगस्ट 2023 : वाढीव व्याजाचे आमिष दाखवत आणखी एकाला भोईर दाम्पत्याने गंडा घातल्याचे उघडकीस आले आहे. डोंबिवलीतील सेवानिवृत्ताची 77 लाखांची फसवणूक केली आहे. याप्रकरणी डोंबिवली रामनगर पोलीस ठाण्यात दाम्पत्याविरोधात गुन्हा दाखल करण्यात आला आहे. शांताराम गणपत निलख असे फसवणूक झालेल्या व्यक्तीचे नाव आहे. पूजा भोईर आणि विशाल भोईर अशी आरोपी दाम्पत्याची नावे आहेत. या दाम्पत्यावर याआधीही फसवणुकीचे अनेक गुन्हे दाखल असल्याचे कळते. अधिक व्याजाचे आमिष दाखवून या दाम्पत्याने अनेकांची फसवणूक केल्याची माहिती मिळते.
ओळखीचा फायदा घेत दाम्पत्याने गंडवले
शांताराम गणपत निलख हे 60 वर्षीय व्यक्ती डोंबिवली शिवमंदिर परिसरात राहतात. निलख यांची कल्याणमधील खडकपाडा परिसरात राहणाऱ्या पूजा भोईर आणि विशाल भोईर यांच्याशी ओळख होती. याचाच फायदा घेत भोईर दम्पत्याने निलख यांचा विश्वास संपादन करुन गुंतवणूक करण्यास भाग पाडले. दर आठवड्याला मोठी रक्कम हातात पडणार असल्याचे आमिष दाखवले. निलख यांनी भोईर दाम्पत्यावर विश्वास ठेवत निलख यांनी 77 लाख रुपये गुंतवले.
रामनगर पोलिसात फसवणुकीचा गुन्हा दाखल
पैसे घेतल्यानंतर शांताराम यांना दर महिन्याला जी ठराविक रक्कम मिळणे आवश्यक होती, मात्र ती रक्कम देण्यास भोईर दाम्पत्य टाळाटाळ करु लागले. सतत तगादा लावूनही भोईर दाम्पत्य व्याजाचे पैसेही परत देत नव्हते, अन् मूळ रक्कमही परत केली नाही. यामुळे आपली फसवणूक झाल्याचे लक्षात येताच निलख यांनी रामनगर पोलीस ठाणे गाठत दामपत्याविरोधात तक्रार दाखल केली. रामनगर पोलीस पुढील तपास करत आहेत.
