गोरेगाव हादरलं! पतीने संपवलं जीवन, गळ्यातील चावीने दार उघडताच घरात डॉक्टर पत्नीचाही मृतदेह, नेमकं काय प्रकरण

मुंबईतील गोरेगावमधून एक धक्कादायक बातमी समोर आली आहे. 58 वर्षीय किशोर पेडणेकर यांनी इमारतीच्या पाचव्या मजल्यावरून उडी मारत आपलं जीवन संपवलं. त्यानंतर पोलीस आल्यावर त्यांच्या गळ्यातील दोन चाव्यांच्या मदतीन घर उघडल्यावर त्यांच्या पत्नीचा राजश्री पेडणेकर यांचा मृतदेह आढळून आला. गोरेगाव पश्चिम टोपीवाला लेनमध्ये घडलेल्या या घटनेमुळे खळबळ उडाली आहे. नेमकं काय आहे प्रकरण जाणून घ्या.

२ ऑगस्टला पहाटे जवाहर नगर येथील टोपीवाला मॉलजवळ बीएमसी परिसरात एक व्यक्ती जखमी अवस्थेत होती. पोलीस घटनेच्या ठिकाणी पोहोचले जखमी व्यक्तीला दवाखान्यात नेलं होतं. मात्र त्याचा आधीत मृत्यू झालेला होता. या व्यक्तीची ओळख पटल्यावर त्यांचं नाव किशोर पेडणेकर असल्याचं समोर आलं. किशोर पेडणेकर यांच्या घरी पोलीस गेल्यावर त्यांचे घर लॉक होते.

घराची चावी नव्हती, मात्र किशोर पेडणेकर यांच्या मृतदेहाच्या गळ्यात दोन चाव्या होत्या. त्या चावीने दार उघडल्यावर पोलिसही हादरून गेले. कारण घरामध्ये पेडणेकर यांच्या पत्नी राजश्री पेडणेकर यांचा मृतदेह आढळला. त्यांच्या मृतदेहाजवळ एक ओढणी होती. त्याच ओढणीने राजश्री पेडणेकर यांची गळा आवळून हत्या केल्याचा अंदाज पोलिसांना आहे. आत्महत्या करण्यापूर्वी किशोर पेडणेकर यांनी त्यांचा मुलगा आणि दिल्लीत राहणाऱ्या एका नातेवाईकासाठी विमानाची दोन तिकिटे काढली होती आणि आत्महत्येची माहिती देण्यासह मालमत्तेची माहिती व्हॉट्सॲपवर मेसेज केली होती.

राजश्री पेडणेकर या डॉक्टर होत्या, त्यांचे पती किशोर पेडणेकर हे वसईमध्ये खासगी नोकरी करत होते, दोघेही अडीच वर्षांपासून डिप्रेशनमध्ये असल्याचे पोलीस तपासात समोर आले आहे. सध्या पोलिसांनी दोन वेगवेगळ्या एडीआर अंतर्गत एफआयआर नोंदवले असून संपूर्ण प्रकरणाचा तपास सुरू आहे.