सेल्फीनंतर आता रील्सचं फॅड, दोन तरुणांच्या शूटिंग दरम्यान दुचाकीला धडक, नंतर जे घडलं ते भयंकर होतं…

अभिजीत पोते, टीव्ही 9 मराठी, पुणे : गेल्या काही महिन्यांपासून सेल्फीनंतर आता रील्सचं ( Reels ) फॅड आलं आहे. त्यामुळे वाट्टेल तिथे रील्स बनविण्याचे प्रकार दिसून येत आहे. त्यामध्ये पुण्यातून एक धक्कादायक प्रकार ( Pune Crime News ) समोर आला आहे. भररस्त्यावर रील्स बनवत असताना मोटारसायकलने, बाजूने चालेल्या दुचाकीला धडक दिल्यानंतर अपघातात महिलेचा मृत्यु झाला आहे. पुण्यातील महमदवाडी या ठिकाणी ही घटना मंगळवारी संध्याकाळी साडे पाच वाजता घडली आहे. यामध्ये मृत्यू झालेल्या महिलेचे नाव तस्लिमा पठाण असे आहे. याप्रकरणी वानवडी पोलीस ठाण्यात दोन तरुणांच्या विरोधात गुन्हा दाखल करण्यात आला आहे.

रील्स करणारे कोण ?

आयान शेख आणि झायद शेख या २ तरुणांवर गुन्हा दाखल करण्यात आहे. पुणे पोलिसांनी त्यांना अटक केली आहे. त्यामध्ये आयान आणि झायद दोघेही बाइकवर स्टंट करत होते. त्याच वेळी बाजूने चाललेल्या महिलेला आयान याच्या दुचाकीची धडक बसली. हे दोघेही तरुण स्टंट करून व्हिडिओ बनवतात आणि सोशल मिडियावर अपलोड करतात.

अपघात कसा घडला ?

सोशल मिडियावर रील्सचे व्हिडिओ शेयर करण्यासाठी दुचाकीवरुन आयान आणि झायद हे वेगवेगळ्या दुचाकी वरुन जात होते. त्याच वेळी एक जण स्टंट करत होता आणि दूसरा व्हिडिओ काढत होता. त्याच वेळी तस्लिमा पठाण या बाजूने जात असतांना लक्षात न आल्याने आयन स्टंट करत असतांना त्याने त्यांच्या दुचाकीला धडक दिली. त्याच वेळी त्या खाली कोसळल्या आणि त्यांचा जागेवर मृत्यू झाला. त्यानंतर दोघांनी तिथून पळ काढला होता.

घटणेची माहिती मिळताच पुणे पोलिसांनी दोघांचा शोध घेण्यास सुरुवात केली होती. त्यानंतर दोघा संशयितांना गजाआड करण्यात आले असून त्यांच्या दुचाकी देखील ताब्यात घेण्यात आलेल्या आहे. अधिकचा तपास केला जात असून तपासात काय समोर येतं हे पाहणं देखील महत्वाचे ठरणार आहे.