हरयाणात अटक चार दहशतवादी नांदेडच्या रिंदाचे साथीदार, सुरक्षा यंत्रणांकडून झाडाझडती

नांदेड : हरयाणातील कर्नाल (Karnal Haryana) इथे नांदेडला येणाऱ्या चार दहशतवाद्यांना (Terrorist Arrest) अटक केल्यानंतर देशभरातील सुरक्षा यंत्रणा नांदेड पोलिसांच्या (Nanded Police) संपर्कात आहेत. अटक केलेले चार जण हे कुख्यात दहशतवादी हरविंदरसिंघ रिंदाचे साथीदार आहेत. रिंदा हा मूळचा नांदेडचा असल्याने देशभरातील सुरक्षा यंत्रणा रिंधाची माहिती गोळा करतायत.

काय आहे प्रकरण?

गेल्या वर्षी लुधियाना इथे हँड ग्रेनेडचा स्फोटात रिंदाच्या साथीदाराचा सहभाग असल्याचे उघड झाले होते, तेव्हापासून रिंदा सुरक्षा यंत्रणेच्या रडारवर आहे. आता त्याचे 4 साथीदार शस्त्र आणि स्फोटके नांदेडला पाठवताना हरियाणात अटक झाले आहेत. त्यामुळे हरयाणा, तेलंगणा, मध्य प्रदेश, आंध्र प्रदेश आणि पंजाब राज्यातील सुरक्षा यंत्रणा नांदेड पोलिसांच्या संपर्कात आहेत.

रिंदाचे 33 साथीदार जामिनावर

रिंदा बाबत ह्या सुरक्षा यंत्रणा माहितीचे आदान प्रदान करत आहेत. दरम्यान , नांदेडमध्ये रिंदाचे जवळपास पन्नास साथीदार असून त्यातील 33 जण हे जामिनावर आहेत, त्यांची झाडाझडती पोलीस घेत आहेत.

कर्नाल इथे अटक केलेल्या दहशतवाद्यांकडून काही धक्कादायक माहिती मिळतेय, अशी चर्चा आहे. मात्र याबाबतीत अधिकृतपणे काहीही सामोरे येत नाही. नांदेड पोलिसांना देखील याबाबतीत काहीही माहिती नाही, असे वरिष्ठ पोलीस अधिकाऱ्याने स्पष्ट केलंय.

मुंबईत मालिका बॉम्बस्फोट होण्याची भीती

5-6 महिन्यांपूर्वी मुंबईत मालिका बॉम्बस्फोट होण्याची भीती व्यक्त केली जात होती. ही भीती हरविंदर सिंग रिंडा याच्याशी संबंधित असल्याचेही सांगितले जात आहे.