मुंबईत तरुणीसोबत रेल्वे स्थानकात जे घडले ते अतिशय घृणास्पद

गोविंद ठाकूर, TV9 मराठी, मुंबई : पु्ण्यात डिलिव्हरी बॉयने तरुणीला किस देत विनयभंग केल्याची घटना ताजी असतानाच आता मुंबईतही अशीच घटना उघडकीस आली आहे. मुंबईतील गोरेगाव रेल्वे स्थानकात (Goregaon Railway Station Mumbai) ही धक्कादायक घटना घडली आहे. सकाळी साडे नऊच्या सुमारास कामावर चाललेल्या 21 वर्षीय तरुणीला खुलेआम किस दिल्याची (Kiss the Girl) संतापजनक घटना गोरेगाव रेल्वे स्थानकात घडली आहे. याप्रकरणी बोरीवली जीआरपीने आरोपीला अटक (Accused Arrested by Borivali GRP) केली आहे.

तरुणी मार्केटिंग कंपनीत नोकरी करते

सदर पीडित तरुणी ही एका मार्केटिंग कंपनीत नोकरी करते. तर आरोपी तरुण हा पेशाने इलेक्ट्रिशियन आहे. अमु कुमार सिंग असे 26 वर्षीय आरोपीचे नाव असून तो नालासोपारा येथील रहिवासी आहे.

सकाळी कामावर जात असताना घडला किळसवाणा प्रकार

पीडित तरुणी ही गोरेगाव रेल्वेस्थानकाच्या पुलावरुन सकाळी साडेनऊच्या सुमारास कामावर चालली होती. यावेळी आरोपी तरुण तिच्या मागे मागे आला आणि तिचे चुंबन घेऊन पळू लागला. यावेळी तरुणीने आरडाओरडा केला.

तरुणीचा आरडाओरडा ऐकून नागरिक धावले

तरुणीचा आरडाओरडा ऐकून पुलावरील उपस्थित प्रवासी नागरिकांनी धावत त्याला पकडले आणि रेल्वे पोलिसांच्या ताब्यात दिले. बोरीवली जीआरपी पोलिसांनी आरोपीला अटक केली आहे.

आरोपी मानसिक रुग्ण

पोलिसांनी दिलेल्या माहितीनुसार, आरोपी आणि पीडिता एकमेकांना ओळखतही नाहीत. आरोपी हा मानसिक रुग्ण आहे. सध्या बोरिवली जीआरपी पोलीस आरोपीला अटक करून पुढील कारवाई करत आहेत. दिवसाढवळ्या भर स्थानकात तरुणीसोबत घडलेल्या या घटनेमुळे तरुणींच्या सुरक्षेचा प्रश्न ऐरणीवर आला आहे.