मुंबईच्या रस्त्यावर महिलेचा केला होता पाठलाग; आरोपीची निर्दोष सुटका, न्यायालयाने ‘हे’ दिले कारण

वैजंता गोगावले, Tv9 मराठी

Updated on: Oct 26, 2022 | 4:10 PM

आरोपीने तिचा तब्बल तीन महिने पाठलाग सुरू ठेवला होता. एवढा दीर्घकाळ पोलिसांत तक्रार दाखल करण्यासाठी कशाची वाट बघत होती? असा सवाल न्यायदंडाधिकारी न्यायालयाने उपस्थित केला.

मुंबईच्या रस्त्यावर महिलेचा केला होता पाठलाग; आरोपीची निर्दोष सुटका, न्यायालयाने 'हे' दिले कारण
तरुणीचा पाठलाग करणाऱ्या आरोपीची निर्दोष सुटका
Image Credit source: TV9 Marathi

मुंबई : देशाची आर्थिक राजधानी असलेल्या मुंबई शहरातील बहुतांश रस्ते गजबजलेले असतात. अशा वर्दळीच्या रस्त्यांवरील गर्दीचा लाभ उठवत काही विकृत लोक तरूणी, अल्पवयीन मुली, महिलांची छेडछाड काढणे (Abusing) तसेच विनयभंगाचे (Molestation) गुन्हे करतात. अशाच प्रकारे मुंबईच्या एका रस्त्यावर आरोपीने तरूणीचा पाठलाग सुरू ठेवला होता. मात्र त्या आरोपीला मुंबईतील महानगर न्यायदंडाधिकारी न्यायालयाने निर्दोष मुक्त केले (Acquitted by the Metropolitan Magistrate Court) आहे.

सकाळच्या सत्रातील पीक अवर्सला फुटपाथवरून चाललेल्या तरुणीचा रस्त्याच्या दुसऱ्या बाजूने आरोपीने दुचाकीवरून पाठलाग सुरू ठेवणे अशक्य आहे, असे मत व्यक्त करीत महानगर न्यायदंडाधिकारी न्यायालयाने 40 वर्षांच्या आरोपीला निर्दोष सोडले आहे.

तरुणीचा तीन महिने पाठलाग सुरू केल्याचा आरोप

आरोपीने तक्रारदार पीडित तरुणीचा जवळपास तीन महिने पाठलाग केल्याचा आरोप होता. मात्र पीडित तरुणीने दिलेल्या जबाबावर विश्वास ठेवण्यास महानगर न्यायदंडाधिकारी न्यायालय स्पष्ट नकार दिला.

कथित प्रकार हा सकाळच्या सुमारास घडला ही गोष्ट वर्णन करण्यापलीकडची आहे, असे मत महानगर न्यायदंडाधिकारी यशश्री मरूळकर यांनी निकाल देताना व्यक्त केले.

मुंबईतील वर्दळीचा रस्ता आणि वेळेची परिस्थिती लक्षात घेता तक्रारदार तरुणीच्या मूळच्या जबाबावर विश्वास ठेवणे कठीण आहे, असेही महानगर न्यायदंडाधिकारी यांनी नमूद केले आहे.

तरुणीने तातडीने पोलिसांत तक्रार का दाखल केली नाही?

तरुणीने आरोपीविरोधात पोलीस स्टेशनला तातडीने तक्रार का दाखल केली नाही? तिच्या म्हणण्यानुसार आरोपीने तिचा तब्बल तीन महिने पाठलाग सुरू ठेवला होता. एवढा दीर्घकाळ पोलिसांत तक्रार दाखल करण्यासाठी कशाची वाट बघत होती? असा सवाल न्यायदंडाधिकारी न्यायालयाने उपस्थित केला.

रस्त्याच्या एका टोकाला आरोपीचे गॅरेज आहे. त्याच गॅरेजच्या परिसरात तरुणी राहते. तिने स्वतःचा पाठलाग केल्याचा केलेला आरोप खोटा आहे, असा दावा बचाव पक्षाच्या वकिलांनी केला. न्यायदंडाधिकाऱ्यांनी बचाव पक्षाचा हा दावा ग्राह्य धरत आरोपीची निर्दोष मुक्तता केली आहे.

हे सुद्धा वाचा


Non Stop LIVE Update

Follow us on

Related Stories

Most Read Stories

Click on your DTH Provider to Add TV9 MARATHI