ललित पाटील यांचे आंतरराष्ट्रीय कनेक्शन, पुणे पोलिसांवर मोठी कारवाई
Pune lalit patil drug case | पुणे येथील ससून रुग्णालयातून फरार झालेला कैदी ललित पाटील याला अटक करण्यात आल्यानंतर धक्कादायक माहिती समोर येत आहे. आता ललित पाटील याचे आंतरराष्ट्रीय कनेक्शन समोर आले आहे. पुणे पोलिसांनी यासंदर्भात गोपणीय अहवाल न्यायालयात सादर केला आहे.
प्रदीप कापसे, पुणे, दि. 21 नोव्हेंबर | अमली पदार्थ तस्करी प्रकरणातील आरोपी आणि ड्रग्स माफिया ललित पाटील सध्या पुणे पोलिसांच्या ताब्यात आहे. ललित पाटील याची पोलीस कोठडी २० नोव्हेंबर रोजी संपली होती. त्यानंतर त्याला पुन्हा न्यायालयात हजर करण्यात आले. त्यावेळी पोलीस तपासातील महत्वाची माहिती न्यायालयात सादर करण्यात आली. यासंदर्भात गोपनीय अहवाल न्यायालयात सादर करण्यात आला. त्यात ललित पाटील याचे आंतरराष्ट्रीय कनेक्शन असण्याची शक्यता व्यक्त केली आहे. यासंदर्भात काही गोष्टी तपासातून समोर आल्याची माहिती न्यायालयात देण्यात आली.
अकरा आरोपींवर मकोका
अमली पदार्थ तस्कार प्रकरणात आणखी चार नावे उघड झाली. त्यातील दोन आरोपी इम्रान शेख उर्फ अतिक अमीन खान आणि रहिश्चंद्र पंत यांना पोलिसांनी अटक केली. या दोघांसह अकरा जणांवर मकोकानुसार कारवाई करण्यात आली आहे. या प्रकरणातील आरोपींचे आंतरराष्ट्रीय कनेक्शन असण्याची शक्यता पोलिसांनी न्यायालयात व्यक्त केली. मेफेड्रोन ड्रग्सची निर्मिती, ड्रग्सची साठवण, ड्रग्सचे वितरण ही माहिती तपासात उघड झाली आहे. त्यात प्रत्येकाचा सहभाग स्पष्ट झाला आहे. यानंतर ललित पाटील, अरविंद लोहरे, भूषण पाटील, जिशान शेख, राहुल पंडित, इम्रान शेख, शिवाजी शिंदे, हरिश पंत यांची पोलीस कोठडी २४ नोव्हेंबरपर्यंत वाढवण्याचे आदेश न्यायालयाने दिले. बचाव पक्षातर्फे आरोपींना पोलीस कोठडीची गरज नसल्याचा युक्तीवाद करण्यात आला.
दोषी पोलिसांवर बडतर्फ करण्याची कारवाई
ललित पाटील प्रकरणात पुणे पोलिसांनी दोन पोलिसांवर मोठी कारवाई केली आहे. नाथ काळे आणि अमित जाधव या दोघांना पोलीस खात्यातून बडतर्फ केले आहे. हे दोघे पोलीस ललित पाटील प्रकरणात चौकशीत दोषी आढळले आहे. यापूर्वी या दोघांना निलंबत करण्यात आले होते. मात्र आता थेट खात्यातून बडतर्फ करण्याची कारवाई करण्यात आली आहे.पोलीस आयुक्त अरविंद चावरिया यांनी सोमवारी हे आदेश काढले. नाथाराम काळे आणि अमित जाधव यांची कोर्ट कंपनी म्हणून ससून रुग्णालयात नेमणूक करण्यात आली होती.
