औरंगाबाद (Aurangabad Lok Sabha constituency)

औरंगाबाद जिल्ह्यात सहा विधानसभा मतदारसंघ आहेत. औरंगाबाद पूर्व, औरंगाबाद मध्य, औरंगाबाद पश्चिम, वैजापूर, गंगापूर आणि कन्नड विधानसभा मतदारसंघ या लोकसभा मतदारसंघात येतात. औरंगाबाद लोकसभा निवडणुकीत तसा शहराचा विकास हा मुद्दा असायला हवा. मात्र गेली अनेक वर्षे तसं होत नाही. हिंदू आणि मुस्लीम याच मुद्द्यावर म्हणजेच हिंदुत्वाच्या मुद्द्यावर निवडणूक होत आली आणि या वेळी तोच प्रत्यय येईल अशी शक्यता आहे. 2019 च्या निवडणुकीत मराठा आरक्षण, धनगर आणि मुस्लीम  आरक्षणाचा मुद्दा नक्कीच महत्त्वाचा ठरला होता. औरंगाबाद जिल्ह्यात 20 वर्षे शिवसेना नेते चंद्रकात खैरे निवडून आले होते. गेल्यावेळी एमआयएमचे इम्तियाज जलील यांनी खैरे यांचा विजयी रथ रोखला होता. 

औरंगाबाद लोकसभा मतदार संघातील मतदार संख्या 18 लाख 84 हजार 865 एवढी आहे. यामध्ये 9 लाख 92 हजार 622 पुरुष तर 8 लाख 92 हजार 217 महिला मतदारांचा समावेश आहे. राज्यात शिवसेना आणि राष्ट्रवादीत फूट पडली आहे. खासकरून शिवसेनेत पडलेल्या फुटीचा या मतदारसंघात मोठा परिणाम होण्याची शक्यता आहे. शिवसेनेच्या फुटीमुळे मतांची मोठ्या प्रमाणात विभागणी होणार असल्याने या मतदारसंघाचा निकाल काय लागतो याकडे सर्वांचं लक्ष लागलं आहे.