कल्याण लोकसभा निवडणूक 2024 (Kalyan Lok Sabha Constituency)

कल्याण लोकसभा शिवसेनेचा बालेकिल्ला मानला जातो. या भागात पालकमंत्री एकनाथ शिंदे यांचं वर्चस्व आहे. या लोकसभा मतदारसंघात राष्ट्रवादी काँग्रेसचे आमदार जितेंद्र आव्हाड हे प्रभावी नेत्यांपैकी एक आहेत. पण ते त्यांचा मतदारसंघ सोडून बाहेर फारसे सक्रिय दिसत नाहीत. 2014 मध्ये राष्ट्रवादीकडून माजी खासदार आनंद परांजपे उमेदवार होते. ते दोनवेळा शिवसेनेकडून निवडून आले होते. सध्या आनंद परांजपे हे ठाण्यात राष्ट्रवादीकडून सक्रिय आहेत. एकंदरीत शिवसेनेसमोर राष्ट्रवादी कमी पडत असल्याचं चित्र दिसत आहे. कल्याण लोकसभेत मनसेचीही ताकत आहे. कारण, या भागात राजू पाटील सक्रीय आहेत. कल्याण लोकसभेत शिवसेनेला भाजप टक्कर देताना दिसून येत आहे. डोंबिवलीचे भाजचे आमदार, राज्य मंत्री रविंद्र चव्हाण यांनी भाजपला मजबूत करण्यासाठी कंबर कसली आहे. 

या मतदारसंघातून श्रीकांत शिंदे हे शिवसेनेच्या तिकीटावर दोनदा निवडून आले होते. यावेळी शिवसेनेत फूट पडलेली आहे. त्यामुळे श्रीकांत शिंदे यांना ही निवडणूक जड जाण्याची शक्यता वर्तवली जात आहे. श्रीकांत शिंदे हे मुख्यमंत्री एकनाथ शिंदे यांचे चिरंजीव आहेत. कल्याण- डोंबिवली हा मतदारसंघ हा शिंदे यांचा बालेकिल्ला मानला जात आहे. त्यामुळे या मतदारसंघात काय निकाल लागतो याकडे सर्वांचं लक्षा लागलं आहे. 

या लोकसभा मतदारसंघात अंबरनाथ विधानसभा मतदारसंघ, उल्हासनगर विधानसभा मतदारसंघ, कल्याण पूर्व विधानसभा मतदारसंघ, डोंबिवली विधानसभा मतदारसंघ, कल्याण ग्रामीण विधानसभा मतदारसंघ आणि मुंब्रा-कळवा विधानसभा मतदारसंघाचा समावेश आहे. गेल्या निवडणुकीत श्रीकांत शिंदे यांनी राष्ट्रवादी काँग्रेसचे बाबाजी बाळाराम पाटील यांचा 3,44,343 मतांनी पराभव केला. श्रीकांत शिंदे यांना 5,59,723 मते मिळाली होती.