मुंबई उत्तर- पूर्व लोकसभा (Mumbai North East Lok Sabha constituency)

कसा आहे मुंबई उत्तर- पूर्व लोकसभा मतदार संघ

मुंबई ईशान्य लोकसभा मतदारसंघ हा महाराष्ट्राच्या 48 लोकसभा जागांपैकी एक आहे. एकेकाळी या लोकसभा मतदारसंघातील काही भाग खाड्या आणि मिठागरांनी वेढलेला होता. या लोकसभा मतदारसंघाची पहिली निवडणूक 1967 मध्ये झाली होती. या परिसरात घाटनदेवीचे प्रसिद्ध मंदिर आहे. या लोकसभा मतदारसंघात येणाऱ्या घाटकोपरला घाटनदेवीचे नाव देण्यात आले आहे.

मुंबई उत्तर- पूर्व लोकसभा निवडणूक इतिहास

मुंबई ईशान्य लोकसभा मतदारसंघात सुमारे 16 लाख मतदार आहेत. मुंबई उपनगर जिल्ह्यातील या लोकसभा मतदार संघात सहा विधानसभा मोडतात. 1967 मध्ये येथे काँग्रेसचे एस. जी. बर्वे विजयी झाले, त्याच वर्षी येथे पोटनिवडणूक झाली, त्यात काँग्रेसच्या उमेदवार तारा गोविंद सप्रे विजयी झाल्या. 1971 मध्येही ही जागा काँग्रेसच्या ताब्यात राहिली आणि राजाराम गोपाळ कुलकर्णी खासदार झाले. 1977 आणि 1988 मध्ये जनता पक्षाने ही जागा काबीज केली आणि पक्षाचे उमेदवार सुब्रमण्यम स्वामी खासदार झाले. 1984 मध्ये काँग्रेसच्या लाटेत या जागेवरून पक्षाचे उमेदवार गुरुदास कामत खासदार झाले.

काँग्रेस आणि भाजपमध्ये हार-जीतचा खेळ

1989 नंतर या मतदार संघात काँग्रेस आणि भाजप आलटून पालटून विजयी झाले. 1989 मध्ये भारतीय जनता पक्षाच्या जयवंतीबेन मेहता या जागेवरून निवडणूक जिंकल्या होत्या. 1991 मध्ये काँग्रेसचे गुरुदास कामत खासदार म्हणून निवडून आले. पुन्हा 1996 मध्ये भाजपचे उमेदवार प्रमोद महाजन हे निवडणुकीत विजयी झाले. 1998 मध्ये काँग्रेसचे उमेदवार गुरुदास कामत पुन्हा निवडणुकीत विजयी झाले. 1999 मध्ये पुन्हा भाजपचे किरीट सोमय्या खासदार म्हणून निवडून आले. 2004 मध्ये काँग्रेसचे गुरुदास कामत जिंकले. 2009 मध्ये या जागेवर राष्ट्रवादी पक्षाचे उमेदवार संजय दिना पाटील खासदार झाले.
 
2014 आणि 2019 च्या निवडणुकीचे निकाल

2014 पासून मोदी लाटेत हा मतदार संघ भाजपच्या ताब्यात गेला. भाजपचे किरीट सोमय्या 2004 मध्ये खासदार झाले. तर 2019 च्या निवडणुकीत भाजपचे मनोज कोटक विजयी झाले होते. 2014 ला भाजपचे उमेदवार किरीट सोमय्या यांनी काँग्रेसचे उमेदवार संजय दिना पाटील यांचा 3,17,122 मतांनी पराभव केला होता. किरीट सोमय्या यांना 5,25,285 मते मिळाली. काँग्रेसचे संजय दिना पाटील यांना 2,08,163 मते मिळाली. 2019 च्या निवडणुकीत भाजपचे मनोज कोटक यांना 5,14,599 मते मिळाली. त्याचवेळी काँग्रेसमधून राष्ट्रवादीत दाखल झालेले संजय दिना पाटील यांना 2,88,113 मते मिळाली. या निवडणुकीत त्यांचा 2,26,486 मतांनी पराभव झाला.