प्रसिद्ध अभिनेत्रीने IPS अधिकाऱ्याच्या कारला मारली टक्कर; केस दाखल होताच दिली अशी प्रतिक्रिया

हैदराबाद : प्रसिद्ध टॉलिवूड अभिनेत्री डिंपल हयाती आणि तिच्या मित्रावरून ज्युबिली हिल पोलिसांनी गुन्हा दाखल केला आहे. अपार्टमेंटजवळील एका आयपीएस अधिकाऱ्याच्या कारचं नुकतान केल्याचा आरोप तिच्यावर आणि तिच्या मित्रावर आहे. डिंपलने तिच्या अपार्टमेंटमधील एका वरिष्ठ अधिकाऱ्याच्या कारला आपल्या कारने जोरात धडक दिल्याची तक्रार आहे. यामुळे कारचं मोठं नुकसान झालं आहे. डिंपल आणि आयपीएल अधिकारी एकाच अपार्टमेंटमध्ये राहतात. अधिकाऱ्याच्या ड्राइव्हरने पोलिसांत डिंपल आणि तिच्या मित्राविरोधात तक्रार दाखल केली आहे.

14 मे रोजी डिंपल आणि तिच्या मित्राने जाणूनबुजून कारला टक्कर मारली, असं ड्रायव्हरने त्याच्या तक्रारीत म्हटलंय. या तक्रारीच्या आधारावर पोलिसांनी डिंपल आणि तिच्या मित्राविरोधात गुन्हा दाखल केला आहे. पोलिसांनी तिला आणि तिच्या मित्राला पोलीस ठाण्यात बोलावलं आणि सीआरपीसीच्या 41ए कलमाअंतर्गत नोटीस बजावली आहे. या घटनेनंतर आता डिंपलने ट्विट करत तिची प्रतिक्रिया दिली आहे. तिने ट्विट करत लिहिलं आहे, ‘ताकदीचा वापर करून चुका लपवल्या जाऊ शकत नाही.’ यासोबतच तिने ‘सत्यमेव जयते’चा हॅशटॅग आणि हसण्याचा इमोजी पोस्ट केला आहे. डिंपलने तिच्या या ट्विटमधून संबंधित आयपीएस अधिकाऱ्याला टोमणा मारल्याचं म्हटलं जातंय.

Misuse of power doesn’t hide mistakes .. ? . #satyamevajayathe

— Dimple Hayathi (@DimpleHayathi) May 23, 2023

डिंपलने आजवर काही तेलुगू आणि तमिळ चित्रपटांमध्ये काम केलंय. डिंपलचे वडील तमिळ भाषिक आहेत तर आई तेलुगू भाषिक आहे. आंध्रप्रदेशमधील विजयवाडा याठिकाणी तिचा जन्म झाला. हैदराबादमध्ये ती लहानाची मोठी झाली. 2017 मध्ये ‘गल्फ’ या तेलुगू चित्रपटातून तिने अभिनयक्षेत्रात पदार्पण केलं. त्यावेळी ती 19 वर्षांची होती. त्यानंतर तिने ‘युरेका’, ‘देवी 2’ यांसारख्या चित्रपटांमध्ये भूमिका साकारल्या आहेत. ‘गड्डलकोंडा गणेश’ या चित्रपटातील ‘जरा जरा’ या आयटम साँगमध्येही ती झळकली होती.