Kedarnath | अभिनयविश्व सोडून संन्यास स्वीकारलेली नुपूर अडकली केदारनाथमध्ये; असा वाचला जीव

केदारनाथ | 1 ऑगस्ट 2023 : अभिनयविश्व सोडून संन्यासाचा मार्ग अवलंबलेली अभिनेत्री नुपूर अलंकार नुकतीच केदारनाथ धामच्या दर्शनाला गेली होती. यावेळी तिथे झालेल्या भूस्खलनामुळे नुपूर केदारनाथमध्ये अडकली. अखेर हेलीकॉप्टरच्या मदतीने रेस्क्यू ऑपरेशन पार पाडलं. नुपूरने तिच्या सोशल मीडिया अकाऊंटवर या रेस्क्यू ऑपरेशनचा व्हिडीओ पोस्ट केला आहे. या व्हिडीओमध्ये तिने तिथे घडलेली सर्व घटना सविस्तर सांगितली आहे. नुपूर ही टेलिव्हिजन इंडस्ट्रीतील लोकप्रिय अभिनेत्री होती. मात्र आईच्या निधनानंतर तिने संन्यास स्वीकारला.

नुपूरने ‘शक्तीमान’, ‘घर की लक्ष्मी बेटियाँ’, ‘अगले जनम मोहे बिटिया कीजो’ यांसारख्या मालिकांमध्ये भूमिका साकारल्या आहेत. मात्र 2022 मध्ये सर्व गोष्टींचा त्याग करत तिने संन्यासाचा मार्ग स्वीकारला. आता ती फक्त देवाच्या भक्तीत लीन असते. विविध मंदिरांमध्ये जाऊन ती देवदर्शन करत असते तर कधी मंदिराबाहेर भिक्षा मागत असते. नुपूर स्वत: तिच्या या संन्यासी आयुष्याची झलक सोशल मीडिया अकाऊंटवर फोटो आणि व्हिडीओ पोस्ट करत चाहत्यांना दाखवते. नुकतीच ती उत्तराखंडमधील केदारनाथ धामच्या दर्शनाला गेली होती.

View this post on Instagram

A post shared by Nupur Alankar (@nupur.alankar)

नुपूरने केदारनाथचे दर्शन केलं. मात्र तिथून परतत असताना जोरदार पाऊस आणि भूस्खलनामुळे ती अडकली. तिच्यासोबत इतरही काही लोक होते. अखेर नुपूर आणि तिच्यासोबत असलेल्या लोकांना हेलीकॉप्टरच्या मदतीने वाचवण्यात आलं. नुपूरने या व्हिडीओमध्ये सांगितलं की कशा पद्धतीने एक अंश सेल्सियसच्या तापमानात ती तिथे राहिली. टेलिव्हिजन इंडस्ट्री सोडल्यानंतर नुपूरने धार्मिक यात्रा सुरू केली होती. आईच्या आजारपणामुळे ती संन्यास घेणं टाळत होती. आईच्या निधनानंतर तिने अध्यात्माचा मार्ग स्वीकारला.

नुपूरने जवळपास 27 वर्षांपर्यंत टीव्ही इंडस्ट्रीत काम केलं आणि त्यानंतर सर्वच गोष्टींचा त्याग केला. तिने तिचा घर-संसारसुद्धा सोडला. संन्यास स्वीकारल्यानंतर तिने तिच्या धार्मिक यात्रेला सुरुवात केली. ग्लॅमरच्या विश्वात आल्यानंतर आलिशान जगणं सोडणं सोपं नसतं. अशा परिस्थितीत नुपूरने काही गोष्टींचा त्याग करत हे नवीन आयुष्य स्वीकारल्याचं चाहत्यांना आवडलंय.