कंगनासोबतच्या ब्रेकअपबद्दल अध्ययन सुमनने सोडलं मौन; म्हणाला “तेव्हा मी 20 वर्षांचा..”
शेखर यांचा मुलगा अध्ययन सुमन हा अभिनेत्री कंगना राणौतला डेट करत होता. 2008 मध्ये कंगना आणि अध्ययनने डेटिंगला सुरुवात केली आणि त्याच्या वर्षभरातच त्यांचा ब्रेकअप झाला. या ब्रेकअपची चर्चा संपूर्ण बॉलिवूड इंडस्ट्रीत झाली होती.
अभिनेता अध्ययन सुमन हा संजय लीला भन्साळी यांच्या ‘हिरामंडी: द डायमंड बाजार’ या वेब सीरिजमध्ये महत्त्वपूर्ण भूमिका साकारणार आहे. बऱ्याच वर्षांनंतर तो कमबॅक करण्यासाठी सज्ज झाला आहे. यामध्ये त्याचे वडील शेखर सुमनसुद्धा त्याच्यासोबत स्क्रीन शेअर करणार आहेत. या वेब सीरिजच्या प्रमोशननिमित्त दिलेल्या एका मुलाखतीत अध्ययनला त्याच्या जुन्या रिलेशनशिपबद्दल प्रश्न विचारण्यात आला. अध्ययन हा अभिनेत्री कंगना राणौतला डेट करत होता. या दोघांचं रिलेशनशिप आणि ब्रेकअप हा बॉलिवूड इंडस्ट्रीत चर्चेचा विषय ठरला होता. कंगनासोबतच्या ब्रेकअपबद्दल अध्ययनला या मुलाखतीत प्रश्न विचारण्यात आला.
आरजे सिद्धार्थ कन्ननला दिलेल्या मुलाखतीत अध्ययनला ब्रेकअपविषयी प्रश्न विचारला असता तो म्हणाला, “मला त्या व्यक्तीविषयी चर्चा किंवा काही वक्तव्य करायचं नाही. ज्या व्यक्तीचा तुम्ही उल्लेख करत आहात, त्या भूतकाळाविषयी मी विसरलोय. पण तुम्ही विचारत असाल तर मी सांगू इच्छितो की माझ्याकडून मी सर्व गोष्टी मिटवलेल्या आहेत. मी माझ्या आयुष्यात खूप पुढे निघून आलोय. हा तेव्हाची गोष्ट आहे, जेव्हा मी वीस वर्षांचा होतो. आता मी 36 वर्षांचा आहे. जुन्या गोष्टींना पकडून बसणं मूर्खपणाचं ठरेल.”
या मुलाखतीत अध्ययनला त्याच्या लग्नाच्या प्लॅनविषयीही प्रश्न विचारला गेला. त्यावर तो म्हणाला, “मला असं वाटतंय की आता माझं आयुष्य रुळावर यायला लागलंय. पुढील दोन वर्षांत कदाचित मी लग्न करेन.” 2008 मध्ये प्रदर्शित झालेल्या ‘राज: द मिस्ट्री कन्टिन्यूज’ या चित्रपटाच्या सेटवर कंगना आणि अध्ययन यांच्यात जवळीक निर्माण झाली. शूटिंगदरम्यान दोघं एकमेकांच्या प्रेमात पडले. मात्र त्यांचं नातं फार काळ टिकलं नाही. ब्रेकअपनंतर अध्ययनने कंगनावर बरेच आरोप केले होते. 2016 मध्ये एका मुलाखतीत जेव्हा कंगना आणि हृतिक रोशन यांच्यात वाद सुरू होता, तेव्हा अध्ययनने पुन्हा एकदा तिच्यावर काळी जादू केल्याचा आरोप केला होता.
एका मुलाखतीत अध्ययनचे वडील शेखर सुमनसुद्धा कंगनासोबतच्या त्याच्या रिलेशनशिपबद्दल मोकळेपणे व्यक्त झाले होते. “आपण सर्वजण आयुष्यातील विविध टप्प्यांतून जातो. जे आज योग्य वाटतं, ते कदाचित उद्या योग्य वाटणार नाही. एखाद्या रिलेशनशिपमध्ये आल्यानंतर ब्रेकअप करण्याची इच्छा कोणाचीच नसते. प्रत्येक जोडीला असं वाटतं की त्यांचं नातं अखेरपर्यंत टीकावं”, असं ते म्हणाले होते.
