आलिया भट्ट गुंतवणुकीतही हुशार, पाहा कुठे गुंतवणूक करुन ती कमावतेय करोडो रुपये

Alia Bhatt : बॉलिवूड अभिनेत्री आलिया भट्ट हिचा नुकताच टाईम मासिकाच्या 100 प्रभावशाली व्यक्तिमत्त्वांच्या यादीत समावेश करण्यात आला आहे. त्यामुळे आलिया सध्या चर्चेत आली आहे. तेव्हापासून प्रत्येकाच्या मनात हाच प्रश्न उपस्थित होतोय की, आलिया भट्टने असे काय केले की तिला टाईम 100 मध्ये स्थान मिळाले आहे. या बातमीत आम्ही तुम्हाला आलिया भट्ट काय व्यवसाय करते, तिचे नेट वर्थ किती, तिचे उत्पन्न आणि गुंतवणूक कुठे आहे ही प्रत्येक माहिती सांगणार आहोत. त्यामुळे आलिया फक्त  अभिनयच नाही तर व्यवसायात देखील अग्रेसर असल्याची गोष्ट कळेल.

आलिया भट्टचा व्यवसाय

आलिया भट्ट टाइम 100 मध्ये तिच्या समावेशामुळे चर्चेत आहे. केवळ ती एक अभिनेत्रीच नाही तर एक स्मार्ट बिझनेस वुमन देखील आहे. ती सोशल मीडियावर देखील खूप सक्रिय आहे. पण जर आपण तिच्या व्यावसायिक गोष्टीबाबत जाणून घेतले तर कळेल की, तिचे प्रॉडक्शन हाऊस देखील आहे.

आलिया भट्टने ओटीटी चित्रपट डार्लिंग्सद्वारे निर्माती म्हणून इंडस्ट्रीत एक नवीन इनिंग सुरू केली. तिच्या प्रॉडक्शन हाऊसचे नाव इटर्नल सनशाईन प्रॉडक्शन्स असे आहे. आलिया अनेक व्यावसायिक उपक्रमांमध्ये सक्रियपणे सहभागी आहे. ज्यामध्ये ED-A-MAMMA चे नाव देखील समाविष्ट आहे.

मुलगी राहा कपूरच्या गरोदरपणात आलियाने D2C बिझनेस मॉडेलसह बिझनेस जगात प्रवेश केला. विशेष बाब म्हणजे देशातील दिग्गज उद्योगपती मुकेश अंबानी यांची कन्या ईशा अंबानी हिचे शेअर्स देखील आलियाच्या या लहान मुलांच्या कपड्याच्या कंपनीत सामील आहेत, ज्यामुळे ED-A-MAMMA चा टर्नओव्हर वेगाने वाढत आहे.

आलिया गुंतवणुकीत खूप हुशार

केवळ व्यवसायातच नाही तर गुंतवणुकीच्या बाबतीतही आलिया भट अतिशय हुशारीने काम करते. मिळालेल्या माहितीनुसार, आलियाने कानपूर IIT च्या D2C वेलनेस कंपनीच्या Phool.CO ब्रँडमध्ये गुंतवणूक केली आहे.

असे म्हटले जाते की अभिनेत्रीला या ब्रँडच्या स्टार्टअपच्या काळापासूनच या ब्रँडमध्ये रस होता आणि तिने यात चांगली रक्कम गुंतवली आहे, ज्यामुळे तिला मोठा नफा होत आहे. यासोबतच आलिया भट्टची नायका आणि स्टाइल क्रॅकर ब्रँड्समध्येही गुंतवणूक आहे.

आलिया भट्टचे उत्पन्न

मीडिया रिपोर्ट्सनुसार, आलिया भट्टची अंदाजे एकूण संपत्ती ₹ 550 कोटींपेक्षा जास्त आहे. ती एका चित्रपटासाठी सुमारे ₹10-12 कोटी रुपये घेते. तिने ‘हार्ट ऑफ स्टोन’मधून तब्बल $500,000 कमावले आहेत. तिने 2021 मध्ये तिची कंपनी Eternal Sunshine Productions लाँच केली. तिची पहिली निर्मिती 2022 मध्ये कॉमेडी/थ्रिलर चित्रपट डार्लिंग्स होती जी Netflix वर प्रदर्शित झाली. 23 फेब्रुवारी रोजी ॲमेझॉन प्राइमवर रिलीज झालेल्या ‘पोचर’ची ती कार्यकारी निर्माती देखील आहे.