Salman Khan: येरवडा शब्द ऐकताच सलमान खान दचकला; म्हणाला, ‘कशाला आठवण करून देतोय हे सगळं…’

‘बिग बॉस 20’चा ग्रँड प्रीमियर सध्या चांगलाच चर्चेत आहे. शोमध्ये यंदा अनेक चर्चित चेहरे सहभागी झाले असून, त्यापैकी रॅपर यंग डीएसएची एण्ट्रीही लक्षवेधी ठरली. यंग डीएसएने आपल्या खास रॅपिंग अंदाजाने प्रेक्षकांचं लक्ष वेधून घेतलं. मात्र, प्रीमियरच्या मंचावर त्याची आणि सलमान खानची झालेली बातचीत अधिक चर्चेत आली आहे. यंग डीएसएची ओळख करून घेताना सलमान खानने त्याला सहज प्रश्न केला की, “तू कुठून आहेस?” यावर रॅपरने अजिबात वेळ न दवडता आपलं उत्तर दिलं. तो म्हणाला, “पुणे, येरवड्यातून.” यंग डीएसएने आपलं ठिकाण सांगताच सलमानच्या चेहऱ्यावरचे हावभाव अचानक बदलले.

यंग डीएसएचं उत्तर ऐकल्यानंतर सलमानने मजेशीर अंदाजात प्रतिक्रिया दिली. “कशाला आठवण करून देतोय हे सगळं,” असं म्हणत त्याने रॅपरची फिरकी घेतली. त्यानंतर सलमानने आणखी एक मजेशीर टिप्पणी करत, “सांगतोय की घाबरवतोय,” अशा अंदाजात वातावरण हलकंफुलकं केलं. सलमान आणि यंग डीएसए यांच्यातील हा संवाद ऐकून प्रेक्षकांमध्येही हशा पिकला.

येरवडा कारागृह आणि सलमानचं कनेक्शन

2015 मधील हिट अँड रन खटल्याच्या सुनावणीदरम्यान सलमानला शिक्षेची कारवाई झाल्यास त्याला पुण्यातील येरवडा मध्यवर्ती कारागृहात ठेवण्याचा पोलीस विचार करत होते. परंतु, मुंबई उच्च न्यायालयाने त्याला अंतरिम जामीन मंजूर केल्यामुळे त्याला येरवडा कारागृहात जावं लागलं नाही.

यानंतर सलमानने रॅपरला आणखी एक थेट प्रश्न विचारला. “कधी कुठल्या गँगमध्ये सामील झाला आहेस का?” असा प्रश्न सलमानने केला. त्यावर यंग डीएसएने स्पष्टपणे “नाही” असं उत्तर दिलं. ‘बिग बॉस’च्या मंचावर सलमान अनेकदा स्पर्धकांची मजेशीर पद्धतीने फिरकी घेताना दिसतो. यंग डीएसएसोबतच्या संवादातही त्याचा हाच अंदाज पाहायला मिळाला.

दरम्यान, यंदाच्या सिझनमध्ये वेगवेगळ्या क्षेत्रातील स्पर्धक सहभागी झाले आहेत. त्यामुळे घरात कोण कोणाशी भिडणार, कोणाची मैत्री होणार आणि यंग डीएसएचा गेम नेमका कसा रंगणार, याकडे आता प्रेक्षकांचं लक्ष लागलं आहे. पुणे आणि येरवड्याचा संदर्भ देत सलमानने केलेल्या या मिश्कील संवादामुळे मात्र प्रीमियरमधील हा क्षण विशेष लक्षात राहणारा ठरला.