दिल्ली मेट्रोमध्ये अभिनेत्रीकडून प्रवाशाला मारहाण, शिवीगाळ; अखेर CISF जवानाकडून मध्यस्थी

दिल्ली | 5 ऑक्टोबर 2023 : बॉलिवूड अभिनेत्री आणि बिग बॉसची माजी स्पर्धक बॉबी डार्लिंगचा दिल्ली मेट्रोतील भांडणाचा व्हिडीओ सोशल मीडियावर तुफान व्हायरल होत आहे. या व्हिडीओमध्ये बॉबी एका पुरुष प्रवाशाला मारताना दिसत आहे. दिल्ली मेट्रोतील प्रवाशांचं भांडण पाहून सीआयएसएफ अधिकारी त्याठिकाणी येतो आणि तो भांडण थांबवण्याचा प्रयत्न करतो. बॉबी डार्लिंग आणि संबंधित पुरुष प्रवाशादरम्यान एका क्षुल्लक कारणावरून भांडण झालं होतं, असं कॅप्शन देत एका युजरने हा व्हिडीओ सोशल मीडियावर पोस्ट केला आहे. या व्हिडीओवर नेटकऱ्यांकडून विविध प्रतिक्रिया येत आहेत.

‘मनोरंजनासाठी मेट्रो ही सर्वोत्तम जागा आहे’, अशी प्रतिक्रिया एका युजरने या व्हिडीओवर दिली. तर ‘ही चित्रपटात काम करायची ना’, असं लिहित दुसऱ्या नेटकऱ्याने बॉबी डार्लिंगला ओळखण्याचा प्रयत्न केला. व्हायरल व्हिडीओमध्ये पहायला मिळतंय की बॉबीच्या हातात एक पांढऱ्या रंगाची बॅग आहे. ती बॅग खेचण्याचा प्रयत्न दुसरा प्रवासी करत असतो. तर सीआयएसएफचा अधिकारी दोघांची समजूत काढण्याचा प्रयत्न करत आहे. बॉबी डार्लिंग त्या प्रवासाला शिवीगाळ करते आणि त्याला मारते.

हा व्हिडीओ सोशल मीडियावर पसरल्यानंतर DMRC ने निवेदन देत घटनेची निंदा केली. ‘आम्ही अशा आपत्तीजनक घटनांची माहिती मिळवण्यासाठी फ्लाइंग स्क्वाडमधून तपास करत असतो. आम्ही लोकांना विनंती करतो त्यांनी अशा प्रकरणांची त्वरित तक्रार करावी आणि आम्हाला माहिती द्यावी. जेणेकरून त्यावर ताबडतोब कारवाई होऊ शकेल’, असं त्यांनी निवेदनात स्पष्ट केलं आहे.

बॉबी डार्लिंगचं खरं नाव पंकज शर्मा आहे. ती ट्रान्स इंडियन अभिनेत्री आहे आणि आतापर्यंत तिने बऱ्याच हिंदी मालिकांमध्ये काम केलं आहे. स्टाइल, मैंने दिल तुझको दिया, ना तुम जानो ना हम, दिल ने जिसे अपना कहा, जीना सिर्फ मेरे लिए, पेज 3, क्या कूल है हम, हंसी तो फंसी यांसारख्या चित्रपटांमध्ये तिने भूमिका साकारल्या आहेत. याशिवाय तिने बऱ्याच लोकप्रिय मालिकांमध्येही काम केलंय. कहीं किसी रोज, कसौटी जिंदगी की, फेम गुरूकुल, क्योंकी सास भी कभी बहू थी, ससुराल सिमर का, इस प्यार को क्या नाम दूँ यांसारख्या लोकप्रिय मालिकांमध्ये ती झळकली.