गाणे म्हणणे सुरू असतानाच ‘या’ गायकाने घेतला जगाचा निरोप, वाचा काय घडले?

मुंबई : प्रसिद्ध गायक मुरली महापात्रा (Murali Mohapatra) यांचे निधन झालय. ओडिशाच्या कोरापुट जिल्ह्यात दुर्गापूजेच्या कार्यक्रमादरम्यान स्टेजवर गाणे म्हणत असतानाच त्यांचा जीव गेलाय. या घटनेनंतर कोरापुट जिल्ह्यात दु: खाचे वातावरण बघायला मिळतंय. मुरली महापात्रा यांच्या निधनाची (Passed away) माहिती त्यांच्या कुटुंबीयांनी दिलीये. ओडिशामध्ये दुर्गापूजेनिमित्त विविध कार्यक्रमांचे (Program) आयोजन करण्यात येते. दुर्गापूजेत गाणे म्हणताना मुरली महापात्रा यांचे निधन झाल्याने परिसरात शोक पसरलाय.

अशी माहिती मिळत आहे की, मुरली महापात्रा यांची तब्येत गेल्या काही दिवसांपासून ठिक नव्हती. त्यामध्येच त्यांनी जेयपोरमध्ये दुर्गापूजेच्या कार्यक्रमात गाणे गायले आणि स्टेजवर असलेल्या खूर्चीवर बसायला जात असतानाच ते खाली पडले. त्यानंतर त्यांना लगेचच रूग्णालयात दाखल करण्यात आले. मात्र, डाॅक्टरांनी त्यांना मृत घोषित केले. या घटनेनंतर मुरली महापात्रा यांच्या कुटुंबावर दु: खाचा डोंगर कोसळलाय.

हृदयविकाराच्या झटक्याने त्यांचा मृत्यू झाल्याचे सांगण्यात येत आहे. गाणे झाल्यानंतर ते खूर्चीकडे जात असतानाच त्यांना हृदयविकाराच्या झटका आला आणि रूग्णालयात नेण्याच्या अगोदरच त्यांचा जीव गेल्याचे देखील सांगण्यात येतंय. मुरली महापात्रा यांच्या निधनाची माहिती त्यांचे बंधू बिभूती प्रसाद महापात्रा यांनी दिलीये.