बोनी कपूर नव्हे तर श्रीदेवी यांनी ‘या’ खास व्यक्तीशी लग्न करावं अशी आईची होती इच्छा

मुंबई- ‘सदमा’ या चित्रपटातील कमल हासन आणि श्रीदेवी यांच्या अभिनयकौशल्याचं कौतुक करावं तेवढं कमी. या चित्रपटाला आणि त्यातील दोघांच्या कामगिरीला प्रेक्षकांकडून भरभरून प्रेम मिळालं होतं. कमल हासन आणि श्रीदेवी यांची ऑनस्क्रीन जोडीसुद्धा अनेकांना खूप आवडली होती. या जोडीला मिळत असलेलं प्रेम पाहून खऱ्या आयुष्यात त्यांनी लग्नबंधनाच अडकावं, अशी श्रीदेवी यांच्या आईची इच्छा होती.

श्रीदेवी यांच्या निधनानंतर कमल हासन यांनी ‘द 28 अवतार्स ऑफ श्रीदेवी’ या नावाने त्यांच्या खास आठवणी लिहिल्या होत्या. श्रीदेवी यांच्या प्रार्थनासभेत त्यांनी ते वाचून दाखवलं होतं. यामध्येच लग्नाच्या प्रसंगाचाही उल्लेख कमल हासन यांनी केला होता.

“श्रीदेवी आणि माझ्यात इतकी चांगली मैत्री झाली होती की त्यांच्या आईने मला तिच्याशी लग्न करण्यास सांगितलं होतं. मात्र ज्या व्यक्तीला मी माझ्या कुटुंबातील व्यक्तीप्रमाणेच मानतो, तिच्याशी मी लग्न करू शकत नाही असं म्हणून मी ती गोष्ट टाळायचो,” असं कमल हासन म्हणाले.

श्रीदेवी यांच्या मनात कमल हासन यांच्यासाठी खूप आदर होता. म्हणूनच त्या नेहमी त्यांना ‘सर’ म्हणून हाक मारायच्या. आमचं नातं, आमची मैत्री खूप पवित्र होती, असं कमल हासन म्हणाले होते.

‘मुंड्रू मुडिचू’ या तमिळ चित्रपटाच्या सेटवर श्रीदेवी आणि कमल हासन यांची पहिल्यांदा भेट झाली होती. त्यावेळी श्रीदेवी फक्त 13 वर्षांच्या होत्या. 1976 मध्ये जेव्हा त्या इंडस्ट्रीतील करिअरची सुरुवात करत होत्या, तेव्हाची ही घटना होती.