त्या भूमिकेमुळे मला गुदमरल्यासारखं..; ‘मिर्झापूर’ फेम अभिनेत्याचा खुलासा
'मिर्झापूर' या बहुचर्चित आणि बहुप्रतिक्षित वेब सीरिजच्या तिसऱ्या सिझनची नुकतीच घोषणा झाली. मात्र या सिझनमध्ये एक महत्त्वपूर्ण भूमिका प्रेक्षकांना दिसणार आहे. ही भूमिका आहे मुन्ना भैय्याची. अभिनेता दिव्येंदूने ही भूमिका साकारली होती.
कुणाल खेमूच्या ‘मडगाव एक्स्प्रेस’मध्ये झळकलेला अभिनेता दिव्येंदूला ‘मिर्झापूर’ या वेब सीरिजमधून प्रचंड लोकप्रियता मिळाली. त्याने साकारलेल्या मुन्ना भैय्याच्या भूमिकेला प्रेक्षकांकडून दमदार प्रतिसाद मिळाला होता. त्यावेळी ‘मिर्झापूर’च्या दुसऱ्या सिझनच्या अखेरीस जेव्हा मुन्ना त्रिपाठीची हत्या दाखवली, तेव्हा चाहत्यांना मोठा धक्का बसला होता. काही दिवसांपूर्वीच ‘मिर्झापूर 3’ची घोषणा झाली, तेव्हा मुन्ना भैय्याच्या भूमिकेविषयी पुन्हा प्रश्न उपस्थित झाले. मात्र तिसऱ्या सिझनमध्ये झळकणार नसल्याचं दिव्येंदूने नुकत्याच दिलेल्या एका मुलाखतीत स्पष्ट केलं. ‘मिर्झापूर’मध्ये साकारलेल्या मुन्ना भैय्याच्या भूमिकेचा स्वत:च्या व्यक्तिमत्त्वावर नकारात्मक परिणाम झाल्याचं त्याने सांगितलं.
‘ह्युमन्स ऑफ बॉम्बे’ला दिलेल्या मुलाखतीत दिव्येंदू म्हणाला, “मला आता हे सांगितलं पाहिजे की मिर्झापूरच्या तिसऱ्या सिझनमध्ये माझी भूमिका नाही. जेव्हा मी ती भूमिका साकारत होतो, तेव्हा त्याचा परिणाम माझ्या व्यक्तिमत्त्वावर खूप झाला. एखाद्या भूमिकेत खोलवर जाण्याचं आपण फार समर्थन केलं नाही पाहिजे. कारण ते सोपं नसतं. कधीकधी माझ्यासाठी ती गोष्ट खूपच नकारात्मक ठरायची. मला गुदमरल्यासारखं वाटायचं. हे इतकं क्लिष्ट असतं की तुम्हाला कळतंही नाही की तुम्ही त्या विशिष्ट झोनमध्ये गेला आहात. जेव्हा तुम्ही त्यातून बाहेर पडता, तेव्हा तुम्हाला समजतं की ते किती नकारात्मक होतं.”
View this post on Instagram
‘मिर्झापूर’ या पॉलिटिकल क्राइम थ्रिलर सीरिजमध्ये दिव्येंदूने महत्त्वपूर्ण भूमिका साकारली होती. या सीरिजचा पहिला सिझन ॲमेझॉन प्राइम व्हिडीओवर 2018 मध्ये प्रदर्शित झाला होता. त्यानंतर दोन वर्षांनी 2020 मध्ये या सीरिजचा दुसरा सिझन प्रेक्षकांच्या भेटीला आला. गेल्या वर्षी जून महिन्यापासून तिसऱ्या सिझनसाठी शूटिंग सुरू आहे. आता या वर्षी ‘मिर्झापूर 3’ प्रदर्शित होणार आहे. मार्च महिन्यात या तिसऱ्या सिझनची घोषणा करण्यात आली होती. यावेळी सीरिजमधील सर्व कलाकार उपस्थित होते. या सीरिजमध्ये अली फजल, पंकज त्रिपाठी, रसिका दुग्गल आणि श्वेता त्रिपाठी शर्मा यांच्या भूमिका आहेत.
