Jui Gadkari: ‘आपण गेल्यावर कोणाचं तरी आयुष्य खूप पॉझिटिव्हली बदलेल,’ जुई गडकरीच्या निर्णयाचं नेटकऱ्यांकडून कौतुक
'कुठल्याही हॉस्पिटलला एक सेक्शन असतं- ऑर्गन ट्रान्सप्लांट असं. बरीच मोठी रांग असते तिथे. लोक हातात जाडजूड फाईल्स घेऊन ताटकळत उभे असतात.'
दरवर्षी 13 ऑगस्ट हा जागतिक अवयवदान दिन (International Organ Donor Day) म्हणून साजरा केला जातो. यादिवशी अनेक संस्थांकडून, सेलिब्रिटींकडून अवयव दानाबद्दल जागरूकता निर्माण केली जाते, त्याच्याशी संबंधित असलेल्या विविध गैरसमज आणि अफवा दूर केल्या जातात. या खास दिवशी मराठी अभिनेत्री आणि बिग बॉस मराठी 1 फेम जुई गडकरीनेदेखील (Jui Gadkari) या मोहिमेत भाग घेतला आणि अवयव दान (Organ Donation) करण्याचं वचन दिलं. जुईने हृदय, आतडे, मूत्रपिंड, यकृत, फुफ्फुसे, स्वादुपिंड आणि डोळे दान करण्याचं वचन दिलं आहे. याविषयी तिने सोशल मीडियावर एक पोस्टसुद्धा लिहिली आहे.
जुई गडकरीची पोस्ट-
‘कुठल्याही हॉस्पिटलला एक सेक्शन असतं- ऑर्गन ट्रान्सप्लांट असं. बरीच मोठी रांग असते तिथे. लोक हातात जाडजूड फाईल्स घेऊन ताटकळत उभे असतात. ऑर्गन ट्रान्सप्लांटसाठी नंबर लावावा लागतो म्हणे. आपल्या रक्तगटाचा अवयव मिळेपर्यंत वाट बघावी लागते. मग वेगवेगळ्या NGO कडून त्या सर्जरीसाठी पैशाची जमवाजमव करावी लागते. एकूणच सगळं खूप प्रेशरचं काम असतं. वेळेत अवयव मिळाला तर ठीक, नाहीतर… या सगळ्या गोष्टी बघून मनात नेहमी प्रश्न यायचे. आपण कशी मदत करु शकतो? आपला कसा उपयोग होईल? मग 2013 साली माहिती काढली आणि सरळ जाऊन नाव नोंदवलं. हो, आता मी ऑर्गन डोनर आहे आणि आज इंटरनॅशनल ऑर्गन डोनर डेला माझ्यासारख्या असंख्य डोनर्सना आजच्या दिवसाच्या शुभेच्छा. हो, शुभेच्छाच! कारण आपण गेल्यावर आपल्या आवयवांमुळे कोणाचं तरी आयुष्य खूप पॉझिटिव्हली बदलेल.’
‘माहितीसाठी- ब्रेन डेड झाल्यानंतर दान करता येणाऱ्या अवयवांमध्ये हृदय, आतडे, मूत्रपिंड, यकृत, फुफ्फुस, स्वादुपिंड आणि डोळे यांचा समावेश होतो आणि मी अभिमानाने सांगू शकते की मी हे सर्व दान केले आहेत. यासाठी वयाची मर्यादा नाही. तुम्ही तुमच्या जवळच्या रुग्णालयांशी संपर्क साधू शकता किंवा ZTCC गुगलवर तुम्ही केंद्रांबद्दल माहिती मिळवू शकता’, अशी पोस्ट तिने लिहिली आहे.
View this post on Instagram
काही दिवसांपूर्वी अभिनेत्री तेजश्री प्रधाननेही नेत्रदान केल्याची माहिती दिली होती. जुईच्या या निर्णयाचं तिचे चाहते आणि कलाविश्वातील तिचे मित्रमैत्रिणी कौतुक करत आहेत.
