बॅटल ऑफ गलवान’ नाव बदललं, अनेकदा रिलीज डेटही पुढे ढकलली; अखेर सलमानच्या ‘मातृभूमी’चा मुहूर्त ठरला!

बॉलिवूडचा ‘भाईजान’ सलमान खानच्या आगामी चित्रपटाची आतुरतेने वाट पाहणाऱ्या चाहत्यांसाठी एक अत्यंत आनंदाची बातमी समोर आली आहे. बराच काळ रखडलेला आणि विविध कारणांमुळे चर्चेत असलेला सलमानचा आगामी चित्रपट ‘मातृभूमी’ अखेर मोठ्या पडद्यावर झळकण्यासाठी सज्ज झाला आहे. चित्रपटाभोवती असलेले सर्व संभ्रम आणि रिलीज डेटबाबतच्या अफवांना पूर्णविराम देत निर्मात्यांनी हा चित्रपट 4 डिसेंबर 2026 रोजी प्रदर्शित होणार असल्याची अधिकृत घोषणा केली आहे.

शीर्षकात बदल अन् कथानकातील फेरबदल

या चित्रपटाचे मूळ नाव ‘बॅटल ऑफ गलवान’ असे होते, जे नंतर बदलून ‘मातृभूमी’ असे ठेवण्यात आले. एवढेच नव्हे तर, कथेच्या गरजेनुसार चित्रपटाच्या दृश्यांमध्ये आणि कथानकात अनेक महत्त्वाचे बदलही करण्यात आले आहेत. चित्रपट आधीच पूर्ण झाला असला तरी, विविध कारणांमुळे त्याच्या रिलीजला उशीर होत होता. नोव्हेंबर किंवा डिसेंबरच्या पहिल्या आठवड्यात चित्रपट येईल अशी चर्चा असताना, आता 4 डिसेंबरची तारीख पक्की करण्यात आली आहे.

मुंबईत दणक्यात ट्रेलर लाँच, सेन्सॉरकडून U/A प्रमाणपत्र

मुंबईतील एका मल्टिप्लेक्समध्ये आयोजित भव्य सोहळ्यात ‘मातृभूमी’चा ट्रेलर लाँच करण्यात आला, ज्यामध्ये रिलीज डेट जाहीर झाली. केंद्रीय चित्रपट प्रमाणन मंडळाच्या (CBFC) वेबसाइटनुसार, या चित्रपटाच्या 4 मिनिटे 43 सेकंद लांबीच्या भव्य ट्रेलरला 4 नोव्हेंबर रोजीच मंजुरी मिळाली असून, त्याला U/A 16+ प्रमाणपत्र मिळाले आहे. सेन्सॉर प्रक्रियेतील काही तांत्रिक विलंबामुळे नोव्हेंबरमधील तारखा पुढे ढकलल्या गेल्या, मात्र आता डिसेंबरच्या पहिल्याच आठवड्यात भाईजान बॉक्स ऑफिस गाजवण्यासाठी सज्ज झाला आहे.

सिनेमाकडे सर्वांचं लक्ष

चित्रपटाच्या प्रदर्शनाची तारीख निश्चित झाल्यामुळे आता सलमान खानच्या चाहत्यांची उत्सुकता आणखी वाढली आहे. ‘मातृभूमी’मध्ये सलमान कोणत्या भूमिकेत दिसणार आणि गलवान खोऱ्यातील संघर्ष मोठ्या पडद्यावर कशा पद्धतीने मांडला जाणार, याकडे सर्वांचे लक्ष लागले आहे. चित्रपटाच्या नावापासून ते कथानकातील बदलांपर्यंत अनेक गोष्टी चर्चेत आल्या आहेत. त्यामुळे डिसेंबरमध्ये हा चित्रपट प्रेक्षकांच्या किती पसंतीस उतरतो, हे पाहणे महत्त्वाचे ठरणार आहे.