अंकिताच्या सासूला पाहताच सलमान खानने मारला टोमणा; पाहतच राहिला विकी
'बिग बॉस 17'च्या ग्रँड फिनालेमध्ये सूत्रसंचालक सलमान खानने अंकिता लोखंडेची सासू रंजना जैन यांची चांगलीच फिरकी घेतली. यावेळी विकी जैन पाहतच राहिला. पुढच्या सिझनमध्ये तुम्हालाच बोलवायाचा विचार करत आहोत, असं सलमान म्हणताच उपस्थितांमध्ये एकच हशा पिकला.
मुंबई : 28 जानेवारी 2024 | रविवारी संध्याकाळी 6 वाजल्यापासून ‘बिग बॉस 17’च्या ग्रँड फिनालेला सुरुवात झाली. कॉमेडियन भारती सिंग आणि कृष्णा अभिषेक यांनी सुरुवातीला बिग बॉसच्या घरात जाऊन स्पर्धकांना पोट धरून हसवलं. त्यानंतर ऑरी म्हणजेच ओरहान अवत्रमणी हा बिग बॉसच्या घरात प्रेक्षकांच्या मनोरंजनासाठी आली. घरातील टॉप 5 स्पर्धकांनी त्यांच्या आईंची खास भेट घेतली. यानंतर सूत्रसंचालक सलमान खान याने स्पर्धक आणि त्यांच्या कुटुंबीयांशी संवाद साधला. यावेळी सलमानने पुन्हा एकदा अभिनेत्री अंकिता लोखंडेची सासू रंजना जैन आणि पती विकी जैन यांना उपरोधिक टोला लगावला.
विकीची आई आणि अंकिताची सासू रंजना जैन या जेव्हा बिग बॉसच्या घरात पहिल्यांदा गेल्या, तेव्हापासून त्या सोशल मीडियावर चर्चेत आल्या आहेत. विविध कारणांमुळे त्यांना सोशल मीडियावर ट्रोलसुद्धा केलं गेलं. आता पुन्हा एकदा सलमानने आपल्याच अंदाजात त्यांना उपरोधिक टोला लगावला आहे. अंकिता आणि बिग बॉसच्या सर्व स्पर्धकांसमोर सलमान रंजना यांना म्हणतो, “अंकितापेक्षा संपूर्ण बिलासपूर आणि देशभरात तुम्हीच अधिक प्रसिद्ध झाला आहात. सगळ्या सुना अंकिताच्या बाजूने असतील तर सगळ्या सासू तुमच्या बाजूनेच झाल्या असतील. पुढच्या सिझनमध्ये तुम्हालाच बिग बॉसच्या घरात स्पर्धक म्हणून बोलवायचा विचार करतोय.”
View this post on Instagram
यानंतर सलमान त्यांनी मुलगा विकीविषयी प्रश्न विचारतो, “विकी आधी अंकिताचा पती म्हणून ओळखला जायचा आणि आता रंजनाचा मुलगा म्हणून ओळखला जाईल. याबद्दल तुम्हाला काय वाटतं?” याचं उत्तर देताना रंजना म्हणतात, “दुसरों को खुशबूदार बनाने के लिए खुद को पहले खुशबूदार बनना पडता है” बिग बॉसच्या ग्रँड फिनालेच्या एक आठवड्याआधी विकी घरातून बाहेर पडला. त्यामुळे कुठेतरी तो फिनालेपर्यंत पोहोचला पाहिजे होता, अशी इच्छा तुमच्या मनात आहे का, असा प्रश्न सलमानने त्यांना विचारला. त्यावर रंजना म्हणाल्या, “ट्रॉफी कोणीही जिंकली तरी ती आमच्याच घरी येणार आहे. मुलगा आणो किंवा मुलगी.. दोन्ही गोष्टी सारख्याच आहेत.”
‘बिग बॉस 17’च्या घरात आणि घराबाहेर सध्या सर्वाधिक चर्चा ही अंकिता लोखंडे आणि विकी जैन या जोडीचीच होत आहे. फॅमिली वीकदरम्यान या दोघांची आई बिग बॉसच्या घरात गेली होती. तिथून बाहेर आल्यानंतर विकीची आई विविध मुलाखतींमध्ये मुलाची बाजू घेताना दिसल्या होत्या. असं करताना त्यांनी अंकिताविषयी काही वादग्रस्त वक्तव्ये केली होती.
