शाहरुख खानने या चित्रपटासाठी सोडले होते 95 लाख रुपये मानधन, नेमकं काय होतं कारण?

बॉलिवूडचा किंग खान अर्थात शाहरुख खान आपल्या अभिनयासोबतच दिलदार स्वभावासाठीही ओळखला जातो. याचा प्रत्यय 2002 मध्ये प्रदर्शित झालेल्या ‘हम तुम्हारे हैं सनम’ या चित्रपटाच्या वेळी आला होता. या चित्रपटासाठी शाहरुखने तब्बल 95 लाख रुपये मानधन न घेण्याचा निर्णय घेतला होता. चित्रपटाचे निर्माते के. सी. बोकाडिया यांनी एका मुलाखतीत याबाबत खुलासा केला आहे.

‘हम तुम्हारे हैं सनम’ या चित्रपटात शाहरुख खानसोबत माधुरी दीक्षित आणि सलमान खान मुख्य भूमिकेत होते. के. एस. अधियामन यांनी या चित्रपटाचे दिग्दर्शन केले होते. विशेष म्हणजे, या चित्रपटाला निर्मितीदरम्यान अनेक अडचणींचा सामना करावा लागला. त्यामुळे चित्रपट पूर्ण होण्यासाठी जवळपास सहा वर्षांचा कालावधी लागला. हा चित्रपट 1995 मध्ये प्रदर्शित झालेल्या तमिळ चित्रपट ‘थोट्टा चिनुंगी’चा हिंदी रिमेक होता. प्रदर्शित झाल्यानंतर चित्रपटाला प्रेक्षकांचा संमिश्र प्रतिसाद मिळाला आणि त्याने बॉक्स ऑफिसवर सुमारे 22 कोटी रुपयांची कमाई केली. चित्रपटातील गाणीदेखील लोकप्रिय झाली होती.

शाहरुखने सोडले 95 लाख रुपये

चित्रपटाचे निर्माते के. सी. बोकाडिया यांनी ANI ला दिलेल्या मुलाखतीत शाहरुखच्या मोठ्या मनाचा किस्सा सांगितला. त्यांनी शाहरुखला या चित्रपटासाठी 2 कोटी रुपये मानधन देण्याचे ठरवले होते. त्यापैकी 1.05 कोटी रुपये त्याला देण्यात आले होते, तर उर्वरित 95 लाख रुपये देणे बाकी होते.

मात्र, शाहरुखने निर्मात्याच्या मुलाच्या सन्मानाखातर उर्वरित रक्कम घेण्यास नकार दिला. अनेक वर्षांनंतरही निर्मात्यांनी त्याला ही रक्कम देण्याचा प्रयत्न केला. परंतु शाहरुखने पैसे स्वीकारण्यास स्पष्ट नकार दिला. पूर्वी कलाकार अशा प्रकारे निर्मात्यांना अडचणीच्या काळात साथ देत असत, असेही बोकाडिया यांनी सांगितले.

काय होती चित्रपटाची कथा?

‘हम तुम्हारे हैं सनम’ या चित्रपटात गोपाल (शाहरुख खान) आणि राधा (माधुरी दीक्षित) यांच्या वैवाहिक आयुष्याची कथा दाखवण्यात आली आहे. राधाचा मित्र सूरज (सलमान खान) याच्याशी असलेला जवळचा संबंध आणि त्याच्या कामाबद्दलची तिची ओढ यामुळे गोपालच्या मनात संशय आणि मत्सर निर्माण होतो. याच संशयामुळे दोघांच्या सुखी संसारात दुरावा निर्माण होतो. नात्यातील विश्वास, गैरसमज आणि संशय यावर चित्रपटाचे कथानक आधारित आहे.