‘धुरंधर 2’मधील आर. माधवनच्या ‘त्या’ सीनमुळे मोठा वाद; शिवसेना नेत्याकडून आंदोलन भडकण्याचा इशारा

‘धुरंधर: द रिव्हेंज’ या चित्रपटाचा नवा वाद समोर आला आहे. आदित्य धर दिग्दर्शित या चित्रपटाच्या एका सीनमध्ये गुरबानीचा अपमान केल्याचा आरोप होत आहे. यावरून राजकीय वातावरण तापलं आहे. शिवसेना नेते गुरजोत सिंह कीर यांनी या दृश्यावर तीव्र नाराजी व्यक्त केली आहे. चित्रपटाच्या निर्मात्यांनी याप्रकरणी सार्वजनिक माफी मागावी, अशी मागणी त्यांनी केली आहे. हा वाद त्या दृश्यावरून होत आहे, ज्यामध्ये अभिनेता आर. माधवनने साकारलेला अजय सन्याल हा गुरबानीचा उल्लेख करतो. गुरबानीचा उच्चार करताना त्याच्या हातात सिगारेट दाखवण्यात आली आहे. असं दाखवणं धार्मिक मर्यादेविरुद्ध असल्याचा आरोप शीख समुदायाने आणि नेत्यांनी केला आहे. यामुळे शीख समुदायाच्या भावना दुखावल्या गेल्याचं म्हटलं आहे.

शिवसेना नेते गुरजोत सिंह कीर यांनी सोशल मीडियावर व्हिडीओ पोस्ट करत ‘धुरंधर 2’मधील हे दृश्य भावना दुखावणारा आणि अस्वीकार्य असल्याचं म्हटलं आहे. “गुरबानी हा शीख धर्मियांचा पवित्र ग्रंथ आहे आणि त्याचं अशाप्रकारे चित्रण करणं कोणत्याही परिस्थितीत समर्थन करण्यासारखं नाही. मी चित्रपट निर्मात्यांना तात्काळ माफी मागण्याची आणि ते वादग्रस्त दृश्य काढून टाकण्याची मागणी करतो”, असं ते पुढे म्हणाले. इतकंच नव्हे तर तात्काळ कारवाई न केल्यास या मुद्द्यावरून आंदोलनं भडकू शकतात, असाही इशारा त्यांनी दिला आहे. “धार्मिक भावनांशी संबंधित बाबींमध्ये, विशेषत: जेव्हा एखाद्या समाजाच्या श्रद्धेचा प्रश्न येतो, तेव्हा संवेदनशील राहणं महत्त्वाचं आहे”, असंही गुरजोत यांनी नमूद केलं.

मिळालेल्या माहितीनुसार, याप्रकरणी एक तक्रारसुद्धा दाखल करण्यात आली आहे. या तक्रारीत चित्रपटाशी संबंधित व्यक्तींवर धार्मिक भावना दुखावल्याचा आरोप करण्यात आला आहे. याप्रकरणी अद्याप दिग्दर्शक आदित्य धर किंवा अभिनेता आर. माधवनने कोणतीही अधिकृत प्रतिक्रिया दिलेली नाही.

‘धुरंधर : द रिव्हेज’ हा चित्रपट 19 मार्च रोजी जगभरातील थिएटर्समध्ये प्रदर्शित झाला असून गेल्या पाच दिवसांत रणवीर सिंहच्या या चित्रपटाने कमाईचा 500 कोटी रुपयांचा टप्पा पार केला आहे. यामध्ये रणवीरसोबतच आर. माधवन, अर्जुन रामपाल, संजय दत्त, राकेश बेदी, सारा अर्जुन यांच्याही भूमिका आहेत.