‘स्प्लिट्सविला’ने ओलांडल्या सर्व मर्यादा; सँडलच्या हिलने मारलं, ओठांतून रक्त.. भडकले प्रेक्षक

‘स्प्लिट्सविला’ हा अत्यंत वादगस्त शो आहे. बिग बॉस या शोप्रमाणेच यामध्येही बरीच भांडणं होतात. सध्या या शोचा सहावा सिझन सुरू असून त्यातही बरेच वादविवाद पहायला मिळत आहेत. आकांक्षा चौधरी आणि दीक्षा पवार यांच्यात जोरदार भांडण झालं आहे. दीक्षाने मारहाण केल्याचा आरोप आकांक्षाने केला आहे. इन्स्टाग्रामवर फोटो पोस्ट करत तिने तिची बाजू मांडली आहे. दीक्षाने मला हिलच्या सँडलने मारलं, माझ्या ओठांतून रक्त येत होतं, असं तिने त्यात म्हटलंय.

या पोस्टमध्ये आकांक्षाने लिहिलं, ‘हे फक्त भांडणं नव्हतं, तर ही हिंसा होती. मला हिलच्या सँडलने मारलं. तिने मला इतके कानाखाली मारले की माझ्या ओठातून रक्तच येऊ लागलं होतं. माझ्या डोळ्यांखाली आणि मानेवर जखमेच्या खुणा आहेत. हे सर्व नॅशनल टीव्हीवर घडलंय, सर्वांसमोर. हा फोटो घटनेच्या 10-15 दिवसांनंतर काढण्यात आला, जेव्हा मला अखेर माझा फोन मिळाला होता. जखमा तेव्हासुद्धा ताज्या होत्या आणि सहज दिसत होत्या. हे सर्व सहन केल्यानंतर मला म्हटलं जातंय की, असं काही घडलंच नाही. जेव्हा लोक माझ्याबद्दल वाटेल ते बोलत होते, तेव्हा मी प्रत्येक दिवशी या जखमांसोबत जगत होती.’

View this post on Instagram

A post shared by Akanksha Choudhary (@akankshachoudhary_official)

‘त्यादिवशी मी आतून खूप कोसळले. मला सुन्न, एकटं आणि पूर्णपणे शटडाऊन झाल्यासारखं वाटत होतं. मला शो सोडायचा होता, पण मी तसं केलं नाही. कारण मी सोडून पळून जाणारी व्यक्ती नाही. आता मी वेदना, एकटेपणा या गोष्टींबाबत सुन्न झाले आहेत. त्यावर आता कोणतीच प्रतिक्रिया देत नाही’, असं तिने पुढे लिहिलं आहे.

‘स्प्लिट्सविला’ या शोमध्ये दिक्षा आणि आकांक्षा यांच्यात जोरदार भांडण झालं होतं. दिक्षाने आकांक्षावर कपडे फेकायला सुरुवात केली होती. त्यानंतर सुझानसुद्धा त्यांच्या भांडणात पडली आणि तिने दिक्षावर कपडे फेकले. दिक्षा आणि आकांक्षाचं हे भांडण मारहाणीपर्यंत पोहोचलं होतं. या घटनेवर सनी लिओनीनेही तीव्र नाराजी व्यक्त केली होती. या भांडणाविषयी सध्या सोशल मीडियावर बरीच चर्चा होत आहे. शोमधील स्पर्धकांच्या सुरक्षेविषयीही प्रश्न उपस्थित केले जात आहेत. याप्रकरणी अद्याप दिक्षाकडून कोणतीच प्रतिक्रिया समोर आली नाही.