भारत-पाकिस्तान वादादरम्यान अभिनेत्रीचा मोठा निर्णय; स्वत:च्याच चित्रपटाचे सर्व..
सध्या भारत-पाकिस्तानमध्ये तणावाचं वातावरण आहे. पाकिस्तानी कलाकारांवर भारतात बंदी घालण्यात आली आहे. अशातच बॉलिवूड अभिनेत्री वाणी कपूरने मोठा निर्णय घेतला आहे. तिचा 'अबीर गुलाल' हा चित्रपट 9 मे रोजी प्रदर्शित होणार होता.
जम्मू-काश्मीरच्या पहलगाममध्ये झालेल्या दहशतवादी हल्ल्यानंतर सर्व पाकिस्तानी कलाकारांवर भारतात बंदी घातली आहे. इतकंच नव्हे तर पाकिस्तानी कलाकारांचे सोशल मीडिया अकाऊंट्ससुद्धा आता भारतात दिसत नाहीत. पहलगाम हल्ल्यामागे पाकिस्तानचा हात असल्याचे पुरावे समोर आल्यानंतर भारत सरकारकडून कठोर पावलं उचलली जात आहेत. अशातच एका बॉलिवूड अभिनेत्रीने मोठा निर्णय घेतला आहे. अभिनेत्री वाणी कपूरचा ‘अबीर गुलाल’ हा चित्रपट प्रदर्शनाच्या वाटेवर होता. परंतु त्यात पाकिस्तानी कलाकार फवाद खानची मुख्य भूमिका असल्याने हा चित्रपट भारतात प्रदर्शित होणार नाही, असा निर्णय माहिती व प्रसारण मंत्रालयाकडून घेण्यात आला. त्यानंतर आता वाणीनेही महत्त्वपूर्ण पाऊल उचललं आहे.
‘अबीर गुलाल’ या चित्रपटातून फवाद खान बॉलिवूडमध्ये पुनरागमन करण्यास सज्ज झाला होता. वाणी आणि फवादचा हा चित्रपट 9 मे रोजी प्रदर्शित होणार होता. गेल्या काही दिवसांपासून सोशल मीडियावर त्याचं जोरदार प्रमोशन सुरू होतं. परंतु पहलगाम हल्ल्यानंतर वाणीने तिच्या सोशल मीडिया अकाऊंटवर फवाद आणि चित्रपटासंबंधीचे सर्व पोस्ट डिलिट केल्याचं समजतंय. वाणीच्या सोशल मीडिया अकाऊंटवर फवाद आणि तिच्या ‘अबीर गुलाल’ या चित्रपटासंदर्भातील कोणतीच पोस्ट दिसत नाही. यावरून असंही म्हटलं जातंय की फवाद खानचा इन्स्टाग्राम अकाऊंट भारतात बंद केल्यामुळे वाणीच्या अकाऊंटवरून ते पोस्ट आपोआप हटवले गेले आहेत.
‘अबीर गुलाल’ या चित्रपटातील ‘अंग्रेजी रंगरसिया’ आणि ‘खुदाया इश्क’ ही दोन गाणी युट्यूबवर प्रदर्शित करण्यात आली होती. परंतु आता ती गाणीसुद्धा युट्यूबवरून काढून टाकण्यात आली आहेत. ही गाणी ‘अ रिचर लेन्स एंटरटेन्मेंट’च्या अधिकृत चॅनलवरून आणि ‘सारेगम’च्या युट्यूब चॅनलवरूनही हटवण्यात आली आहेत.
वाणी कपूरने 22 एप्रिल रोजी सोशल मीडियावर ‘अबीर गुलाल’मधील एक गाणं पोस्ट केलं होतं. नंतर तिने त्याच दिवशी हे गाणं डिलिट केलं होतं. यानंतरही अनेकांनी तिला बॉयकॉट करण्याची मागणी केली होती. पहलगाम हल्ल्यानंतरही पाकिस्तानी कलाकारासोबतच्या चित्रपटाला ती कसं पाठिंबा देऊ शकते, असा सवाल नेटकऱ्यांनी केला होता. एकीकडे भारतात ‘अबीर गुलाल’च्या प्रदर्शनावर बंदी आणली, तर दुसरीकडे पाकिस्तानमध्येही हा चित्रपट प्रदर्शित होऊ दिला नाही. कारण त्यात भारतीय अभिनेत्री वाणीची भूमिका आहे.
