Vicky Kaushal : “आता आणखी काहीही नको…” लेक विहानबद्दल बोलताना भावुक झाला विकी कौशल

बॉलिवूड अभिनेता विकी कौशल (Vicky Kaushal) सध्या पालकत्वाचा प्रवास एन्जॉय करतोय. साधारण वर्षभरापूर्वी तो बाबा बनला असून लाडक्या लेकासोबत जास्तीत जास्त वेळ घालवण्याचा त्याचा प्रयत्न असतो. वडील झाल्यावर आयुष्याकडे पाहण्याचा दृष्टिकोन बराच बदलला आहे, असं तो म्हणाला. नुकत्याच दिलेल्या एका मुलाखतीत त्याने पालकत्वाबद्दल खुलेपणाने भाष्य केलं. आई-बाबा बनल्यावर कतरिना आणि त्याचा अनुभव कसा होता, हेही त्याने सांगितलं.

गेल्या वर्षी, नोव्हेंबर 2025 मध्ये कतरिना कैफने मुलाला जन्म दिला. दोघांनी त्याचं नाव विहान ठेवलं, आता इतक्या काळाने विकीने पालकत्वावर भाष्य केलं असून हा जादुई अनुभव असल्याचं म्हटलं. कतरिना आणि विहानला एकत्र पाहिल्यावर खूप इमोशनल वाटतं असंही त्याने नमूद केलं.

काय म्हणाला विकी कौशल ?

हरीत जावेरी ज्वेलर्सच्या YouTube चॅनलला दिलेल्या मुलाखतीत विकी कौशलने वडील झाल्यानंतरच्या आपल्या अनुभवाबद्दल मनमोकळेपणाने भाष्य केलं. बाबा झाल्यानंतर आयुष्यात झालेल्या बदलांना शब्दांत व्यक्त करणं सोपं नसल्याचं तो म्हणाला. तो अनुभव इतका सुंदर, जादुई आहे की केवळ शब्दांत मांडणं कठीण आहे, असं विकीने म्हटलं.

यावेळी बोलताना विकीने मुलगा विहानच्या लहान-मोठ्या टप्प्यांबद्दलही सांगितलं. बाळाचं पहिल्यांदा हसणं, त्याचे नवे एक्सप्रेशन्स आणि वेगवेगळे हावभाव पाहणं हा त्याच्यासाठी अत्यंत खास अनुभव असल्याचं तो म्हणाला. गेल्या 10 महिन्यांत असे अनेक क्षण आले, जेव्हा त्याला वाटलं की, “ हीच आयुष्यातील संपूर्ण आनंदाची वेळ आहे आणि आता मला आणखी काहीही नको. ” – अशा शब्दांत त्याने आपला अनुभव मांडला.

कतरिनासोबत विहानला पाहून विकीला कसं वाटतं?

विकीने पत्नी कैटरीना कैफ आणि मुलगा विहानसोबत घालवलेल्या खास क्षणांचाही उल्लेख केला. पत्नीच्या चेहऱ्यावरचा आनंद आणि मुलाचं हसू पाहताना तो क्षण तिथेच थांबावा आणि आपण तो आणखी काही वेळ अनुभवावा, असं वाटत असल्याचं त्याने सांगितलं.

आई-वडील झाल्यानंतर माणूस पूर्वीपेक्षा अधिक संवेदनशील होतो, असंही विकीने म्हटलं. त्याचबरोबर जबाबदारीची जाणीवही वाढते. आता केवळ आपल्या बोलण्याकडेच नाही, तर आपल्या कामाकडे आणि वागण्याकडेही अधिक काळजीपूर्वक पाहावं लागतं, असं त्याने सांगितलं.

विकी कौशलचं वर्कफ्रंट

दरम्यान, विकी कौशल लवकरच रणबीर कपूर आणि आलिया भट्टसोबत ‘लव्ह अँड वॉर’ या चित्रपटात दिसणार आहे. संजय लीला भन्साळी दिग्दर्शित या चित्रपटातील तिघांचा पोस्टर नुकताच प्रदर्शित करण्यात आला होता. त्यामुळे चित्रपटाबाबत चाहत्यांची उत्सुकता आणखी वाढली आहे. ‘लव्ह अँड वॉर’ हा चित्रपट 21 जानेवारी 2027 रोजी चित्रपटगृहात प्रदर्शित होणार आहे.