Pamela Chopra | राणी मुखर्जीच्या कुटुंबावर कोसळला दु:खाचा डोंगर; सासू पामेला चोप्रा यांचं निधन
राणी मुखर्जीची सासू आणि दिवंगत दिग्गज दिग्दर्शक यश चोप्रा यांची पत्नी पामेला चोप्रा यांचा निधन झालंय. वयाच्या 85 व्या वर्षी त्यांनी अखेरचा श्वास घेतला. पामेला या पाश्वगायिका होत्या. इतकंच नव्हे तर त्या लेखिका आणि निर्मातीसुद्धा होत्या.
मुंबई : अभिनेत्री राणी मुखर्जीच्या कुटुंबावर दु:खाचा डोंगर कोसळला आहे. राणी मुखर्जीची सासू आणि दिवंगत दिग्गज दिग्दर्शक यश चोप्रा यांची पत्नी पामेला चोप्रा यांचा निधन झालंय. वयाच्या 85 व्या वर्षी त्यांनी अखेरचा श्वास घेतला. पामेला या पाश्वगायिका होत्या. इतकंच नव्हे तर त्या लेखिका आणि निर्मातीसुद्धा होत्या. पामेला यांच्या निधनाने बॉलिवूड इंडस्ट्रीवर शोककळा पसरली आहे. गुरुवारी सकाळी त्यांनी या जगाचा निरोप घेतला. पामेला या आदित्य आणि उदय चोप्रा यांच्या आई होत्या. जवळपास 11 वर्षांपूर्वी पामेला यांचे पती यश चोप्रा यांचं निधन झालं होतं.
लिलावती रुग्णालयात होत्या दाखल
पामेला यांना 15 दिवसांपूर्वी मुंबईतल्या लिलावती रुग्णालयात दाखल करण्यात आलं होतं. गेल्या 15 दिवसांपासून त्यांच्या उपचार सुरू होते. त्या व्हेंटिलेटरवर होत्या. गुरुवारी सकाळी त्यांची प्रकृती आणखी बिघडली. यशराज फिल्म्सच्या ‘द रोमँटिक्स’ या डॉक्युमेंट्रीमध्ये पामेला शेवटच्या झळकल्या होत्या. या डॉक्युमेंट्रीमध्ये त्या पती यश चोप्रा आणि त्यांच्या प्रवासाविषयी मोकळेपणे व्यक्त झाल्या होत्या. ‘द रोमँटिक्स’मध्ये यश चोप्रा यांच्या इंडस्ट्रीतील योगदानासोबतच पामेला यांच्या कामावरही प्रकाश टाकण्यात आला होता. निर्माते म्हणून आपला पहिला चित्रपट प्रदर्शित होण्यापूर्वी यश चोप्रा यांची परिस्थिती काय होती, याविषयीही त्यांनी सांगितलं होतं. चित्रपटातील काही गोष्टींच्या बाबतीत महिलांचा दृष्टीकोण जाणून घेण्यासाठी ते नेहमी पामेलाची मदत घ्यायचे, असंही त्यांनी सांगितलं.
1970 मध्ये यश चोप्रा यांच्याशी केलं लग्न
पामेला यांनी 1970 मध्ये यश चोप्रा यांच्याशी लग्न केलं. या दोघांचं अरेंज मॅरेज होतं. यश आणि पामेला चोप्रा यांना आदित्य आणि उदय ही दोन मुलं आहेत. आदित्य हा प्रसिद्ध चित्रपट निर्माता आणि दिग्दर्शक आहे. त्याने अभिनेत्री राणी मुखर्जीशी लग्न केलं. तर उदय हा अभिनेता आणि निर्माता आहे.
‘दिल तो पागल है’ची पटकथा लिहिली
1976 मधील ‘कभी कभी’पासून ते 2002 मधील ‘मुझसे शादी करोगी’पर्यंत असंख्य गाणी पामेला चोप्रा यांनी गायली आहेत. 1993 मध्ये प्रदर्शित झालेल्या ‘आईना’ या चित्रपटाची निर्मिती त्यांनी केली होती. त्याचसोबत त्यांनी पती यश चोप्रा, मुलगा आदित्य चोप्रा आणि लेखिका तनुजा चंद्रा यांच्यासोबत 1997 मध्ये प्रदर्शित झालेल्या ‘दिल तो पागल है’ या चित्रपटाची पटकथा लिहिली होती. या चित्रपटातील एका सीनमध्येसुद्धा त्या झळकल्या होत्या. ‘एक दुजे के वास्ते’ या गाण्याच्या ओपनिंग सीनमध्ये पामेला पतीसोबत दिसल्या होत्या.
