2027 पर्यंत चीन तैवानला ताब्यात घेणार? जाणून घ्या

चीन आता तैवान ताब्यात घेण्याची योजना आखत असल्याचं बोललं जात आहे. चीनचे राष्ट्राध्यक्ष शी जिनपिंग यांनी 2027 पर्यंत तैवानवर ताबा मिळवण्यासाठी हलचाली सुरू केल्या आहेत. चीनच्या लष्कराला सज्ज राहण्याचे निर्देश दिल्याचं अमेरिकेच्या स्ट्रॅटेजिक फोर्सेसचे कमांडर जनरल अँथनी कॉटन यांनी अमेरिकन काँग्रेसला सांगितलं आहे. याविषयी पुढे विस्ताराने जाणून घेऊया.

तैवानबाबत चीनची आक्रमकता आणि अण्वस्त्रांच्या वाढत्या शस्त्रास्त्रांबाबत अमेरिकेच्या लष्करी आणि शस्त्रास्त्र नियंत्रण तज्ज्ञांनी नवी माहिती दिली आहे. चीनचे राष्ट्राध्यक्ष शी जिनपिंग यांनी 2027 पर्यंत तैवानवर ताबा मिळवण्यासाठी चीनचे लष्कर सज्ज राहण्याचे निर्देश दिले आहेत, अशी माहिती अमेरिकेच्या स्ट्रॅटेजिक फोर्सेसचे कमांडर जनरल अँथनी कॉटन यांनी अमेरिकन काँग्रेसला दिली आहे. याच कारणामुळे चीन अण्वस्त्रनिर्मितीला प्रोत्साहन देत आहे. ही अण्वस्त्रे जमीन, हवा आणि समुद्रातून डागली जाऊ शकतात.

काय आहे चीनचे आण्विक धोरण?

त्याचबरोबर कोणत्याही परिस्थितीत अण्वस्त्रांचा वापर करणारा तो पहिला देश ठरणार नाही, या आपल्या राष्ट्रीय संरक्षण धोरणातील प्रदीर्घ आश्वासनाचा पुनरुच्चार चीनने केला. यात ‘नो फर्स्ट यूज’ धोरणाचाही समावेश आहे, ज्यात चीन अण्वस्त्रे नसलेल्या देशाविरुद्ध अण्वस्त्रांचा वापर करणार नाही किंवा धमकावणार नाही, असे आश्वासन देण्यात आले आहे. या प्रश्नांना उत्तर देताना बीजिंगच्या संरक्षण मंत्रालयाने म्हटले आहे की, अणुयुद्ध जिंकता येत नाही आणि लढू नये.”

तैवानवर अणुहल्ला करू शकतो चीन?

चीनच्या लष्करी सामर्थ्यावरील वार्षिक अहवालात अमेरिकेच्या संरक्षण विभाग पेंटागॉनने चीनची जाहीर भूमिका खोटी असल्याचे म्हटले आहे. चीनच्या धोरणात पारंपरिक हल्ल्यांना प्रत्युत्तर म्हणून अण्वस्त्रांचा संभाव्य पहिला वापर समाविष्ट आहे, ज्यामुळे शत्रूच्या आण्विक शक्ती, कमांड आणि कंट्रोलची व्यवहार्यता नष्ट होईल, असे पेंटागॉनने म्हटले आहे.

पेंटागॉनने गेल्या वर्षाच्या अखेरीस प्रसिद्ध केलेल्या एका अहवालात म्हटले आहे की, तैवानमधील पारंपरिक लष्करी पराभवामुळे कम्युनिस्ट राजवटीचे अस्तित्व धोक्यात आल्यास बीजिंग अण्वस्त्रांच्या पहिल्या वापराचाही विचार करेल.

चीन वेगाने अण्वस्त्रे वाढवत आहे?

बुलेटिन ऑफ द अ‍ॅटॉमिक सायंटिस्ट्सनुसार, चीन इतर कोणत्याही अण्वस्त्रधारी देशापेक्षा वेगाने आपल्या शस्त्रसाठ्याचा विस्तार आणि आधुनिकीकरण करत आहे. त्यात म्हटले आहे की, चीनकडे सध्या सुमारे 600 अण्वस्त्रे आहेत. चीन सुमारे 350 नवीन क्षेपणास्त्र सायलो आणि रस्त्यावर आधारित मोबाइल प्रक्षेपकांसाठी अनेक नवीन तळ बांधत आहे.

चीनकडे 712 जमिनीवरील क्षेपणास्त्र प्रक्षेपक

असा अंदाज आहे की, चीनच्या लष्कराकडे, पीपल्स लिबरेशन आर्मीकडे जमिनीवरील क्षेपणास्त्रांसाठी सुमारे 712 प्रक्षेपक आहेत, परंतु सर्व अण्वस्त्रांसाठी नाहीत. यातील 462 प्रक्षेपकांना अमेरिकेपर्यंत पोहोचू शकणाऱ्या क्षेपणास्त्रांनी भरता येईल, असे या अहवालात म्हटले आहे.

‘बुलेटिन’च्या मूल्यांकनात म्हटले आहे की पीएलएप्रक्षेपकांपैकी अनेक क्षेपणास्त्रे प्रादेशिक लक्ष्यांवर हल्ला करण्याच्या उद्देशाने कमी पल्ल्याची क्षेपणास्त्रे आहेत, परंतु त्यापैकी बहुतेक अणुहल्ल्यासाठी डिझाइन केलेली नाहीत.