Israel-Hamas War | युद्ध अजून भडकणार, पॅलेस्टाईनच्या पक्षात इतके देश एकत्र, इस्त्राईलविरोधात काढले फर्मान

नवी दिल्ली | 12 ऑक्टोबर 2023 : हमास या दहशतवादी संघटनेने 6 ऑक्टोबर रोजी इस्त्राईलवर (Israel-Hamas War) अचानक हल्ला चढवला होता. चवताळलेल्या इस्त्राईलने प्रतिहल्ले वाढवले. त्यात गाझा पट्टीतील अनेक इमारती जमीनदोस्त झाल्या आहेत. या युद्धात दोन्ही बाजूची मोठी जीवितहानी आणि संपत्तीचे नुकसान झाले आहे. आता अरब राष्ट्रांनी या युद्धात दखल देण्यास सुरुवात केली आहे. 22 अरब राष्ट्रांनी (Arab Gulf Nations) इस्त्राईलविरोधात मोर्चा उघडला आहे. इस्त्राईलने गाझा पट्टीची नाकाबंदी केल्याने आखाती देशांनी इस्त्राईलची निंदा केली आहे. त्यांनी इस्त्राईलविरोधात हे फर्मान काढले आहे. त्यामुळे हे युद्ध लवकर संपण्याची चिन्हे दिसत नाहीत.

इस्त्राईलचे हल्ले सुरुच

गाझा पट्टीचा संपूर्ण नाकाबंदी करण्यात आली आहे. वीज-पाणी बंद करण्यात आले आहे. त्यामुळे पॅलेस्टाईनच्या शहरात परिस्थिती बिघडली आहे. इस्त्राईलने क्षेपणास्त्र हल्ले वाढवले आहे. त्यामुळे अनेक इमारती जमीनदोस्त झाल्या आहे. इस्त्राईलच्या एअरस्ट्राईकचा मोठा परिणाम दिसून येत आहे. यामध्ये महिला-मुलांना प्राण गमावावे लागले.

गाझा पट्टीत मृत्यूचे तांडव

इजिप्तमधील काहिरा येथे अरब राष्ट्रांच्या परराष्ट्र मंत्र्यांची बैठक पार पडली. यामध्ये हमास-इस्त्राईल युद्धावर चर्चा झाली. या संघटनेने गाझा पट्टीची दमकोंडी थांबविण्याची मागणी केली आहे. या गरीब आणि दाट लोकवस्तीला तातडीने पायाभूत सुविधा पुरविण्याचे फर्मान सोडले आहे. इस्त्राईलच्या घेराबंदीविरोधात अरब राष्ट्रांनी आवाज उठवला आहे. इस्त्राईलच्या सातत्याने होणाऱ्या हल्ल्यामुळे गाझा पट्टीत मृत्यूचे तांडव सुरु असल्याचा आरोप त्यांनी केला. अरब लीगचे महासचिव अहमद अबुल घेईत यांनी इस्त्राईलवर डोळे वटारले आहेत.

पॅलेस्टाईनला स्वतंत्र देशाचा दर्जा देण्याची मागणी

अरब लीगमध्ये सौदी अरब, इजिप्त, इराक, जॉर्डन, कुवेत, लेबनॉन, लिबिया, मॉरिटानिया, मोरक्को, ओमान, पॅलेटस्टाईन, कतार, सोमालिया, सूडान, सिरिया, ट्यूनिशिया, संयुक्त अरब अमिरात, यमन, अल्जिरिया, बहरीन, कोमोरोस आणि जिबुती या राष्ट्रांचा समावेश आहे. त्यांनी पॅलेस्टाईनला स्वतंत्र राष्ट्राचा दर्जा देण्याची विनंती केली आहे. 57 देशांच्या मुस्लीम संघटनेने पण हल्ल्याचा निषेद केला आहे. आता हे देश पॅलेस्टाईनच्या मागे उभे ठाकले आहे. त्यासाठी आर्थिक रसद पण पुरविण्यात येत आहे. त्यामुळे इस्त्राईल-हमासचे हे युद्ध लवकर संपण्याची चिन्हे नाहीत