नको तेच घडलं… पाकिस्तानात बुरखाधारींचा नंगानाच, मंत्र्याचं अपहरण, हजारो लोक रस्त्यावर

पाकिस्तानातील टेन्शन वाढलं आहे. पेशावरमध्ये बुरखाधारी (मुखवटा घातलेले) लोकांनी कहर केला आहे. या बुरखाधारी लोकांनी माजी पंतप्रधान इम्रान खान यांच्या पक्षाचे खैबर पख्तूनख्वा प्रांताचे मंत्री फजल शकूर खान यांचं अपहरण केलं आहे. या घटनेचा व्हिडीओ समोर आला आहे. काही बुरखाधारींनी मंत्र्याची गाडी अडवली. कारच्या टायरवर गोळीबार केला. त्यानंतर त्यांना उचलून दुसऱ्या गाडीत टाकलं आणि अज्ञात ठिकाणी घेऊन गेले, असा दावा पीटीआयने केला आहे. या घटनेच्या निषेधार्ध पीटीआयचे हजारो कार्यकर्ते रस्त्यावर उतरून निदर्शने करत आहेत. रविवारी इम्रान खान यांच्या पीटीआय पार्टीचं इस्लामाबादेत जोरदार निदर्शने होणार आहेत. या पार्श्वभूमीवर हे अटकसत्र सुरू असल्याने पाकिस्तानमध्ये खळबळ उडाली आहे.

मिळालेल्या माहितीनुसार, मंत्री फजल शकूर खान यांच्या गार्डसने कथितपणे पोलीस चौकशीला विरोध केला. त्यामुळे बुरखाधारी लोकांनी गोळीबार सुरू केला. त्यानंतर हे अपहरण नाट्य घडल्याचं सांगितलं जातं. कालच इम्रान खान यांच्या तिन्ही बहिणींना घरात झोपलेल्या असताना अटक केली. त्यांना कुठे ठेवलं याची माहिती समोर आलेली नाही. पण त्यामुळे पाकिस्तानात आधीच संतापाची लाट पसरलेली असतानाच त्यात आता मंत्र्याच्या अपहरणाची घटना घडल्याने आणखीनच दहशत निर्माण झाली आहे.

या घटनेने संपूर्ण प्रांतातमध्ये मोठ्या प्रमाणात आंदोलन सुरू झालं आहे. हजारो लोक रस्त्यावर उतरून निदर्शने करत आहेत. त्यामुळे कायदा आणि सुव्यवस्था ढासळली आहे. खैबर पक्ख्तूनख्वाचे माहिती मंत्री शफी जान यांनी ही कारवाई संविधान, कायदा आणि जनादेशावर करण्यात आलेला हा हल्ला आहे, असं म्हटलं आहे.

मंत्र्याचं अपहरण

काही बुरखाधारी आणि शस्त्रास्त्र घेतलेले लोक आले होते. त्यांनी पेशावरच्या मोटरवे टोल प्लाजाजवळ मंत्री फजल शकूर खान यांची गाडी थांबवली. सोशल मीडियावर या घटनेचा व्हिडीओ व्हायरल झाला आहे. अनोळखी लोक मेन हायवेला ब्लॉक करून तिथे बॅरियर लावताना दिसत आहेत.

प्रांतीय विधानसभा आणि पेशावर हायकोर्टाच्या समोर मंत्र्याची गाडी रोखण्यासाठी बुरखाधारी लोकांनी कारच्या टायरवर गोळ्या चालवल्या. या दरम्यान, मलाकंदमध्ये पीटीआयचे प्रमुख नेता आणि आमदार शकील अहमद यांच्याही अपहरणाच्या प्रयत्नाची चर्चा सुरू झाली. त्याचा एक कथित व्हिडीओही समोर आला आहे. हे वृत्त येताच मलाकंद येथील नागरिकांचा भडका उडाला. पीटीआयच्या कार्यकर्त्यांनी बुट खैला बायपासवर रास्ता रोको करत हा रस्ताच बंद करून टाकला. त्यामुळे या बायपासवरील वाहतूक ठप्प झाली. निदर्शकांनी रस्त्यावर टायर जाळून निषेध नोंदवला. घोषणाबाजी करत सरकारचाही निषेध केला. आमच्या नेत्यांना टार्गेट केलं तर सहन केलं जाणार नाही, असा इशाराच आंदोलकांनी दिला आहे.

रुग्णालयांना आदेश

ड्रॉप साइट न्यूजच्या वृत्तानुसार, इस्लामाबादमध्ये पीटीआयच्या मार्चपूर्वी सरकारकडून रुग्णालयांना काही आदेश देण्यात आले आहेत संभाव्य मानवी संकट येणार आहे. यावेळी असंख्य लोक जखमी होऊ शकतात. त्यामुळे तुम्ही तयार राहा, असे आदेश रुग्णालयांना देण्यात आले आहेत. यावरून रविवारी पाकिस्तानात मोठा राडा होण्याचे संकेत मिळत आहे. दरम्यान, सरकारचे आदेश मिळताच रुग्णालयांनी महत्त्वाच्या शस्त्रक्रिया पुढे ढकलल्या आहेत. तसेच रुग्णालयीन कर्मचाऱ्यांच्या सुट्ट्याही रद्द केल्या आहेत. तसेच सुट्टीवरील कर्मचाऱ्यांना तातडीने कामावर ज्वॉईन होण्याचे आदेश दिले आहेत. याशिवाय जे रुग्ण बरे झाले आहेत, त्यांना रुग्णालयातून घरी सोडलं जात आहे.