जर कोणी खामेनेईंच्या हत्येचा विचारही केला, तर…; एका बलाढ्य देशाची इस्त्रायलला धमकी

इराण आणि इस्रायल एकमेकांवर मिसाइल हल्ले करत आहेत. या तणावपूर्ण परिस्थितीत रशियाने इराणला पाठिंबा दिला आहे. इस्रायलचे पंतप्रधान बेंजामिन नेतन्याहू यांनी इराणमध्ये सत्तापरिवर्तन हा आपला हेतू नसल्याचे स्पष्ट केले. परंतु सध्याच्या परिस्थितीमुळे असे होण्याची शक्यता असल्याचेही नमूद केले. दुसरीकडे, रशियाने इराणमधील सत्तापरिवर्तनाच्या कोणत्याही चर्चेला पूर्णपणे अस्वीकार्य ठरवले आहे.

इस्रायलच्या सार्वजनिक वृत्तवाहिनी ‘कान’ला दिलेल्या मुलाखतीत नेतन्याहू म्हणाले, “इस्लामी प्रजासत्ताकात सत्तापरिवर्तन हा प्रथम इराणी जनतेचा प्रश्न आहे. याला पर्याय नाही. म्हणून मी कधीही याला आमचे ध्येय म्हणून मांडले नाही. होय, हल्ल्याचा परिणाम म्हणून असे होऊ शकते, पण हे इस्रायलचे अधिकृत ध्येय नाही.”

वाचा: जुलैमध्ये होणार विध्वंस, काउंटडाउन सुरू झालं? नव्या बाबा वेंगाच्या भविष्यवाणीमुळे जगात दहशत!

इस्रायलचे परराष्ट्रमंत्री गिदोन सार यांनीही सध्याच्या घडीला इराणी शासन बदलण्याची कोणतीही अधिकृत इस्रायली धोरण नसल्याची पुष्टी केली. नेतन्याहू आणि सार संयमित वक्तव्ये करत असताना, इस्रायलचे संरक्षणमंत्री इस्रायल कात्झ यांनी मात्र आक्रमक भूमिका घेतली. त्यांनी इराणचे सर्वोच्च नेते आयातुल्ला अली खामेनेई यांना “आता जिवंत ठेवता येणार नाही” असे म्हटले. तेल अवीवजवळील एका रुग्णालयावर नुकत्याच झालेल्या मिसाइल हल्ल्यामागे खामेनेई यांचाच हात असल्याचा त्यांचा दावा आहे, ज्यात डझनभर लोक जखमी झाले.

खामेनेई यांच्या हत्येचा विचार अस्वीकार्य

या घडामोडींवर रशियाने तीव्र प्रतिक्रिया व्यक्त केली. क्रेमलिनचे प्रवक्ते दिमित्री पेस्कोव यांनी ‘स्काय न्यूज’ला सांगितले, “इराणमधील सत्तापरिवर्तनाची चर्चाही अस्वीकार्य आहे. आणि जर कोणी खामेनेई यांच्या हत्येचा विचार करत असेल, तर त्याने समजून घ्यावे की तो ‘पेंडोरा बॉक्स’ उघडत आहे.” ‘पेंडोरा बॉक्स’ ही ग्रीक पौराणिक कथेतील एक म्हण आहे, ज्याचा अर्थ एकदा सुरू झालेल्या कृतीमुळे अनियंत्रितपणे अनेक समस्या उद्भवणे असा होतो. पेस्कोव म्हणाले, “इराणमधील सत्तापरिवर्तन अकल्पनीय आहे. याबद्दल बोलणेही सर्वांसाठी अस्वीकार्य आहे.”

रशियाची इस्रायलला चेतावणी

पेस्कोव यांनी चेतावणी दिली, “जर असे झाले तर इराणमधून तीव्र प्रतिक्रिया येईल, आणि ती अतिशय उग्र असेल. यामुळे इराणमध्ये अतिरेकी भावना भडकतील आणि जे (खामेनेई यांच्या हत्ये) बोलत आहेत, त्यांनी हे लक्षात ठेवावे.” रशिया आणि इराण यांच्यातील सैन्य आणि कूटनैतिक संबंध दीर्घकाळापासून आहेत, जे युक्रेन युद्धानंतर आणखी मजबूत झाले आहेत.

रशियाची ही चेतावणी इस्रायल आणि अमेरिकेसाठी महत्त्वपूर्ण संदेश मानली जात आहे. स्वत: खामेनेई यांनीही अमेरिका आणि इस्रायलवर हल्ला करताना म्हटले, “जर अमेरिकेला मध्यस्थी करावी लागत असेल, तर याचा अर्थ इस्रायल अपयशी ठरला आहे.” त्यांनी पुढे जोडले, “इस्रायली शासनाची कमजोरीच त्यांना इतरांच्या आधाराची गरज भासत आहे.”