मोठी बातमी! ट्रम्प यांचा भारताला पुन्हा दणका, 25 टक्के अतिरिक्त कर लादला

अमेरिकेचे राष्ट्राध्यक्ष डोनाल्ड ट्रम्प यांनी भारताला पुन्हा दणका दिला आहे. अमेरिकेने भारतावर 25 टक्के अतिरिक्त कर लादण्याची घोषणा केली आहे. अमेरिकेने हा निर्णय घेताना म्हटलं आहे की, भारताने रशियन तेलाची सतत खरेदी केल्यामुळे हा निर्णय घेण्यात आला आहे. याआधी अमेरिकेने भारतावर 25% टॅरिफ लावला होता. त्यामुळे आता अमेरिकेचा एकूण कर 50 % झाला आहे. ही भारतासाठी चिंतेची बाब आहे.

अतिरिक्त कर 21 दिवसांत लागू होणार

डोनाल्ड ट्रम्प यांनी भारतावर लादलेला अतिरिक्त कर 21 दिवसांच्या आत लागू होणार आहे. म्हणजेच 27 ऑगस्ट 2025 पासून हा कर लागू होणाप आहे. मात्र या तारखेपूर्वी निघून 17 सप्टेंबर 2025 पूर्वी अमेरिकेत पोहोचलेल्या वस्तूंवर हा कर आकारला जाणार नाही. विशेष म्हणजे हा कर इतर सर्व शुल्क आणि करांव्यतिरिक्त असणार आहे, मात्र काही विशेष प्रकरणांमध्ये यात सूट दिली जाण्याची शक्यता आहे.

डोनाल्ड ट्रम्प यांनी 24 तासांपूर्वीच भारतावर कर वाढवण्याची धमकी दिली होती. एका मुलाखतीत ट्रम्प म्हणाले होते की, जर भारताने रशियाकडून तेल खरेदी सुरू ठेवली तर कर आणखी वाढवला जाईल. आता ट्रम्प ते औषध आयातीवरील कर 250 टक्क्यांपर्यंत वाढवण्याची शक्यता आहे. जो आतापर्यंतचा सर्वात मोठा कर असू शकतो.

आधी लावला होता 25 टक्के कर

या आधी अमेरिकेने 29 जुलै रोजी भारतावर 25 टक्के कर लावल्याची घोषणा केली होती. डोनाल्ड ट्रम्प यांनी भारत आणि अमेरिकेतील संबंध तितकेसे चांगले नाहीत असंही विधान केलं होतं. अमेरिकेच्या या निर्णयामुळे भारताच्या निर्यातीवर परिणाम होणार आहे. आता आणखी कर वाढल्याने भारताची अर्थव्यवस्था संकटात सापडण्याची शक्यता आहे.

भारत हा रशियन तेलाचा सर्वात मोठा खरेदीदार

भारत हा रशियाकडून मोठ्या प्रमाणात तेलाची खरेदी करतो. 2022 मध्ये रशिया-युक्रेन युद्ध सुरू झाल्यानंतर, अनेक युरोपीय देशांनी रशियासोबतच्या व्यापारावर बहिष्कार टाकला होता. अमेरिका आणि युरोपीय देशांनी रशियन तेलावर बंदी घातली होती, मात्र भारत आणि चीन सारख्या आशियाई देशांनी रशियाकडून मोठ्या प्रमाणात तेल खरेदी केले होते. भारत अजूनही रशियाकडून मोठ्या प्रमाणात तेल खरेदी करत आहे. त्यामुळे अमेरिकेने भारतावर हा कर लादला आहे.