औरंगाबादेत नातेवाईकांनी जंगलात सोडलेल्या 90 वर्षीय आजीची कोरोनावर मात

औरंगाबाद : एका 90 वर्षीय कोरोना पॉझिटिव्ह आजीबाईंना त्यांच्या नातेवाईकांनीच जंगलात सोडून दिल्याचा प्रकार उघडकीस आला होता. या 90 वर्षाच्या कोरोनाबाधित आजीने कोरोनावर मात केली आहे. त्यानंतर आता औरंगाबादमधील मदर तेरेसा वृद्धाश्रमात त्या आजींची सुश्रुषा केली जाणार आहे. (Aurangabad Corona positive grandmother tested negative)

औरंगाबादमधील कच्चीघाटी परिसरात काही नातेवाईकांनी आपल्या 90 वर्षीय कोरोनाबाधित आजींना थेट जंगलात सोडलं. शनिवारी 8 ऑगस्टला हा सर्व प्रकार समोर आला होता. तब्बल 18 दिवसानंतर या आजींनी कोरोनावर मात केली आहे. या आजी कोरोनामुक्त झाल्यानंतरही तिचे कोणीही नातेवाईक तिला घरी नेण्यासाठी किंवा बघण्यासाठी आले नाही. त्यामुळे या निराधार आजीला पोलिसांनी चिखलठाना जवळील वृद्धाश्रमात दाखल केलं आहे. औरंगाबादच्या मदर तेरेसा वृद्धाश्रमात त्या आजींची सुश्रुषा केली जाणार आहे.

नेमकी घटना काय?

औरंगाबादमधील कच्चीघाटी परिसरात 8 ऑगस्टला एका 90 वर्षीय कोरोना पॉझिटिव्ह आजीबाईंना त्यांच्या नातेवाईकांनीच जंगलात सोडून दिलं होतं. यानंतर या घटनेने एकच खळबळ उडाली होती. जर्जर म्हाताऱ्या आजींना जंगलात टाकून संबंधित नातेवाईक फरार झाले होते. या आजींना पोलिसांनी रुग्णालयात दाखल केलं होतं. त्यांच्यावर जिल्हा रुग्णालयात उपचार सुरु होते.

आजीला जंगलात सोडून पळून गेलेल्या नातेवाईकांविरोधात पोलिसांनी गुन्हा दाखल केला आहे. लवकरच या नातेवाईकांना अटक होण्याची शक्यता वर्तवली जात होती.  (Aurangabad Corona positive grandmother tested negative)

संबंधित बातम्या :

औरंगाबादेत कोरोनाग्रस्त 90 वर्षीय आजीला जंगलात सोडलं, निर्दयी नातेवाईक पसार, गुन्हा दाखल