अमेरिकेच्या ‘या’ निर्णयाने भारताला हजारो कोटींचा फटका

नवी दिल्‍ली : अमेरिकेचे प्रमुख डोनाल्‍ड ट्रम्प यांनी भारताचा व्यापारात प्राधान्य (GSP) देण्याचा दर्जा रद्द केल्याने भारताला हजारो कोटींचा फटका बसणार आहे. व्‍हाईट हाऊसने दिलेल्या माहितीनुसार 5 जून 2019 रोजी हा दर्जा समाप्‍त होईल. भारताच्या बाजारपेठेत अमेरिकेला समान संधी देण्याचे आश्वासन न दिल्याने आपण हा निर्णय घेतल्याचे ट्रम्प यांनी सांगितले.

ट्रम्प म्हणाले, “भारताने अमेरिकेला भारतीय बाजारपेठेत न्याय्य आणि तर्कसंगत संधी देण्याचे आश्वासन दिलेले नाही. त्यामुळेच हा निर्णय घेण्यात आला असून तो योग्य आहे. 5 जून 2019 पासून भारताचा व्यापार प्राधान्याबाबतचा दर्जा रद्द करण्यात येईल.”

भारताने अमेरिकेच्या कंपन्यांना बाजारपेठेत योग्य संधी दिली, तर भारताला अमेरिकेकडून व्यापारात फायदा मिळू शकतो, असे मत अमेरिकेच्या एका वरिष्‍ठ अधिकाऱ्याने सांगितले. संबंधित अधिकारी म्हणाले, “जर भारताने अमेरिकी कंपन्यांना आंतरराष्ट्रीय व्यापारात मदत होईल असे डाटा लोकलायजेशनसह अन्य ई-कॉमर्ससंबंधित महत्त्वाचे निर्णय घेतल्यास भारत आणि अमेरिका सोबत येऊन चांगली प्रगती करु शकतो.”

भारत GSP चा सर्वात मोठा लाभार्थी

अमेरिकेने विकसनशील देशांना त्यांच्या आर्थिक विकासासाठी एका मर्यादेपर्यंत करमुक्त निर्यात करता यावी यासाठी ‘जनरलाईज सिस्टम ऑफ प्रेफरन्स’ (GSP) हा कार्यक्रम सुरु केला आहे. भारत GSP अंतर्गत फायदा घेणारा सर्वात मोठा देश आहे. भारत यामुळे 5.6 बिलियन डॉलर मूल्‍याच्या उत्पादनांची विनाशुल्क अमेरिकेत निर्यात करु शकत होता. मात्र, 5 जूनपासून भारताला याचा लाभ घेता येणार नाही.

दरम्यान, ट्रम्प यांनी हा निर्णय घेतल्यास भारताने देखील अमेरिकेच्या 20 पेक्षा अधिक कंपन्यांच्या उत्पादनावरील आयात कर वाढवण्याचा इशारा दिला होता.