मला कळत नाही शरद पवार यांना कोण मारणार?, निलेश राणे यांची टीका; भाजपला घरचा आहेर?

राष्ट्रवादी कॉंग्रेसचे सर्वेसर्वा शरद पवार यांना केंद्र सरकार झेड प्लस सुरक्षा पुरविणार आहे. आगामी काळ निवडणूकांचा आहे. राजकीय क्षितिजावर शरद पवार हे जुन्या पिढीचे नेते आपल्या घरातच फूट पडल्याने पुन्हा आपल्या पक्षाची पत मिळविण्यासाठी महाराष्ट्र पिंजून काढणार आहेत. या पार्श्वभूमीवर त्यांना राज्याची झेड प्लस सुरक्षा असताना केंद्रीय रिझर्व्ह पोलिस दलाच्या अधिकाऱ्यांनी पवार यांच्याशी चर्चाविनिय करीत त्यांची सुरक्षा वाढविण्याचा निर्णय घेतला आहे. यावर आता भाजपाचे नेते निलेश राणे यांनी सोशल मिडीयावर एक पोस्ट करीत टिका केली आहे. मला कळत नाही शरद पवार यांना कोण मारणार आहे ? असा सवाल करीत निलेश राणे यांनी आपल्या पक्षाला घरचा आहेर दिला आहे.

राष्ट्रवादी काँग्रेस नेते शरद पवार यांना केंद्राने झेड प्लस सुरक्षा पुरविली आहे. यासंदर्भात आढावा घेण्यात येऊन त्यांच्या दिमतीला मोठा फौजफाटा नेमण्यात आला आहे.शरद पवार यांच्या सिल्वर ओक निवास स्थानी या संदर्भात सीआरपीएफचे अधिकारी आले होते. त्यांनी शरद पवार यांच्याशी चर्चा केली. त्यानंतर त्यांना केंद्रीय सुरक्षा पुरविण्याचा प्रस्ताव देण्यात आला. त्यास शरद पवार यांनी स्वीकारल्याचे म्हटले जात आहे. एसटी संपाच्या वेळी शरद पवार यांच्या सिल्वर ओक या निवासस्थानावर हल्ला करण्यात आला होता. त्यानंतर त्यांच्या सुरक्षेचा आढावा घेत हा निर्णय घेतला गेला आहे.

काय आहे नेमकी पोस्ट –

शरद पवारांना झेड प्लस सिक्युरिटी मिळाली आहे, ५५ CRPF त्यांना संरक्षण देणार. मला कळत नाही त्यांना कोण मारणार आणि कोणापासून त्यांना धोका आहे??

बातमी वाचली आणि वाटलं की ५० वर्ष फक्त देशात आणि राज्यात कळ काढत बसलं तरी कुणालाही झेड प्लस संरक्षण मिळतं की काय??

— Nilesh N Rane (Modi ka Parivaar) (@meNeeleshNRane) August 21, 2024

आयुष्यात करुन दाखवावं – विद्या चव्हाण

भाजपाचे नेते माजी खासदार निलेश राणे यांनी सोशल मिडियावर एक पोस्ट केली आहे. त्यात ते म्हणतात की शरद पवारांना झेड प्लस सिक्युरिटी मिळाली आहे, 55 CRPF जवान त्यांना संरक्षण देणार. मला कळत नाही त्यांना कोण मारणार आणि कोणापासून त्यांना धोका आहे?? बातमी वाचली आणि वाटलं की पन्नास वर्ष फक्त देशात आणि राज्यात कळ काढत बसलं तरी कुणालाही झेड प्लस संरक्षण मिळतं की काय?? असा सवाल निलेश राणे यांनी केला आहे.दरम्यान राष्ट्रवादीच्या नेत्या विद्या चव्हाण यांनी या ट्वीटला उत्तर दिले आहे. त्या म्हणाल्या की पवार साहेबांना सुरक्षेची नेमकी गरज काय ते निलेश राणे यांनी सांगू नये त्यानी 50 वर्षात केलेल्या कामापैकी किमान थोड तरी आयुष्यात करुन दाखवावं असा टोला विद्या चव्हाण यांनी लगावला आहे.