कोरोना काळात डोनाल्ड ट्रम्प अडखळले, पण मोदींनी देशाला वाचवलं : जे. पी. नड्डा

पाटणा : अमेरिकेत कोरोना संकट हा निवडणुकीचा मुद्दा बनला होता. विरोधकांनी प्रचारसभांमध्ये डोनाल्ड ट्रम्प यांच्या कार्यपद्धतीवर प्रचंड टीका केली. त्याचाच परिणाम आता निवडणुकीच्या निकालांमध्ये दिसत आहे. मात्र, या निवडणुकीचा मुद्दा पकडत भाजपचे राष्ट्रीय अध्यक्ष जे. पी. नड्डा यांनी मोदी सरकारच्या कामांचं कौतुक केलं (J P Nadda appreciate work of Modi Government).

“अमेरिकेच्या अध्यक्षपदाच्या निवडणुकीचा निकाल आता समोर येत आहे. कोरोनाविरोधाच्या लढाईत डोनाल्ड ट्रम्प अडखळले. पण भारतात योग्यवेळी लॉकडाऊनचा निर्णय घेऊन पंतप्रधान मोदींनी देशाच्या नागरिकांना वाचवण्याचं काम केलं”, असा दावा जे. पी. नड्डा यांनी केला (J P Nadda appreciate work of Modi Government).

बिहारमध्ये तिसऱ्या टप्प्याच्या निवडणुकीसाठी प्रचाराची रणधुमाळी सुरु आहेत. मतदारांचे मत जिंकण्यासाठी प्रत्येक पक्षाचे नेते अनेक दावे करत आहेत. जिंकून आलं तर प्रभावीपणे जनतेचं काम करु, असं आश्वासन देत आहेत. भाजपचे राष्ट्रीय अध्यक्ष जे. पी. नड्डा हेदेखील प्रचारात व्यस्त आहेत. ते आज (5 नोव्हेंबर) दरभंगा येथील प्रचारसभेत बोलत होते.

“भारतात जेव्हा कोरोना आला तेव्हा देशात टेस्टसाठी फक्त एकच लॅब होती. मात्र, आज देशभरात जवळपास 15 लाख टेस्ट होत आहेत. लॉकडाऊनदरम्यान सरकारने या संकाटविरोधात लढण्यासाठी तयारी केली. पीपीई किट आणि व्हेंटिलेटरचं उत्पादन आज देशात होत आहे”, असं जे पी नड्डा म्हणाले.

जे पी नड्डा यांनी आपल्या भाषणात राष्ट्रीय जनता दलावर सडकून टीका केली. “बिहार आता कंदिल युगातून एलईडी युगाकडे जात आहे, बाहुबलीतून निघून विकास बलच्या दिशेने जात आहे”, असं जे पी नड्डा म्हणाले.

“बिहार निवडणुकीत राम जन्मभूमीचा विषय का काढतात? असा सवाल लोक करतात. सीतामातेच्या जन्मभूमीवर राम जन्मभूमीची बात नाही करणार तर कुठे करायची? मोदी पुन्हा मुख्यमंत्री बनल्यानंतर सुप्रीम कोर्टाने राम जन्मभूमीच्या पक्षाने निकाल दिला. आता अयोध्येत भव्य मंदिर बांधलं जात आहे”, असं जे पी नड्डा आपल्या भाषणात म्हणाले.

हेही वाचा : “आली-आली-आली, गेली-गेली-गेली”, भाजप अध्यक्षांकडून प्रचारात बिहारमधील लहानपणीचा किस्सा