जलयुक्त शिवार योजनेची चौकशी सुरू, मराठवाड्यातून सुरुवात; भाजपच्या अडचणी वाढणार?

माजी मुख्यमंत्री देवेंद्र फडणवीस यांच्या महत्त्वकांक्षी जलयुक्त शिवार योजनेच्या चौकशीस सुरुवात झाली आहे. (Jalyukt shivar scheme probe start from aurangabad)

भीमराव गवळी | Updated on: Dec 12, 2020 | 10:40 AM

औरंगाबाद : माजी मुख्यमंत्री देवेंद्र फडणवीस यांच्या महत्त्वकांक्षी जलयुक्त शिवार योजनेच्या चौकशीस सुरुवात झाली आहे. मराठावाड्यातून ही चौकशी सुरू झाली असून त्यामुळे भाजपच्या अडचणीत वाढ होण्याची शक्यता वर्तवण्यात येत आहे. (Jalyukt shivar scheme probe start from aurangabad)

मराठवाड्यात जलयुक्त शिवार योजनेची जिल्हानिहाय चौकशी होणार आहे. एकूण 2 हजार 417 कोटी रुपयांच्या कामांची चौकशी करण्यात येणार आहे. मराठवाड्यात 6 हजार 20 गावांमध्ये जलयुक्तची कामे झाली होती. यावेळी अनेक गुत्तेदार आणि मजूर संस्थांनी घोटाळे केल्याचा संशय असल्याने ही चौकशी करण्यात येणार आहे.

पावणे दोन लाख कामे संशयाच्या भोवऱ्यात

मराठवाड्यातील जलयुक्त शिवार कामाची जिल्हानिहाय चौकशी करण्यासाठी जलसंधारण आणि आयुक्त कार्यालयातील अधिकाऱ्यांची समिती स्थापन करण्यात आली आहे. ही चौकशी समिती जलयुक्तचे जिल्हानिहाय रेकॉर्ड तपासणार आहे. मराठवाड्यातील तब्बल पावणे दोन लाख कामे संशयाच्या भोवऱ्यात असल्याने ही चौकशी होत आहे. त्यामुळे भाजपची डोकेदुखी वाढण्याची शक्यता वर्तवण्यात येत आहे. (Jalyukt shivar scheme probe start from aurangabad)

योजना असफल

दरम्यान, जलयुक्त शिवार योजना अपयशी ठरल्याचं सांगत राज्य सरकारने या योजनेच्या चौकशीचे आदेश दिले होते. या योजनेवर 9 हजार 634 कोटी रुपये खर्च करूनही पाण्याची गरज भागवण्यात तसेच भूजल पातळी वाढवण्यात अपयश आल्याचा ठपका कॅगने ठेवला होता. जलयुक्त शिवार योजना राबवूनही राज्यातील टँकर्सची संख्या वाढलेलीच असल्याचंही कॅगने म्हटलं होतं. त्यामुळे सरकारने या योजनेची चौकशी करण्याचा निर्णय घेतला होता. कॅगने पाहणी केलेल्या 120 गावांपैकी एकाही गावात दुरुस्ती आणि देखभालीसाठी सरकारने अनुदानच दिले नसल्याचं आढळून आलं होतं. तर विरोधकांनी मात्र, ही योजना यशस्वी झाल्याचा दावा केला होता. (Jalyukt shivar scheme probe start from aurangabad)