18 तासांची झुंज अपयशी, नाशिकमधील विहिरीत पडलेल्या एसटीतून अखेर बाळाचा मृतदेह बाहेर

नाशिक : नाशिकमधील एसटी आणि अॅपे रिक्षाच्या अपघातानंतर विहिरीत पडलेल्या बाळाचा मृतदेहच अखेर हाती आला. एनडीआरएफच्या पथकाने केलेली 18 तासांच्या प्रयत्नांची शिकस्त अखेर व्यर्थ (Nashik ST Bus Baby Rescue) ठरली. एसटी-रिक्षा अपघातातील मृतांचा आकडा 26 वर पोहचला आहे.

अपघातग्रस्त एसटीमधील लहान बाळ विहिरीत अडकल्याची माहिती बचाव पथकाला देण्यात आली होती. त्यानुसार अपघाताच्या दिवशी (मंगळवारी) रात्री उशिरापर्यंत बचावकार्य सुरु होतं. मात्र अंधारामुळे अडथळे आल्याने शोध मोहीम थांबवण्यात आली.

एनडीआरएफच्या जवानांनी आज (बुधवारी) सकाळीच बचावकार्याला पुन्हा सुरुवात केली, मात्र त्यांच्या पदरी निराशा आली. एसटीमध्ये अडकलेल्या बाळाला बाहेर काढलं, तोवर त्याचा श्वास बंद झाला होता.

एसटी-रिक्षाच्या भीषण अपघातात सख्ख्या भावांवर काळाचा घाला, जावा बचावल्या

नाशिकमध्ये एसटी आणि अॅपे रिक्षामध्ये जोरदार धडक होऊन झालेल्या विचित्र अपघातातील मृतांचा आकडा 26 वर पोहचला आहे. अपघातानंतर दोन्ही वाहनं विहिरीत कोसळली होती. मालेगाव-देवळा रस्त्यावर झालेल्या अपघातात 35 जण जखमी असून मृतांचा आकडा वाढण्याची भीती व्यक्त केली जात आहे.

अपघाताची माहिती मिळताच अग्निशमन दल आणि पोलिसांनी एसटीतून प्रवाशांना बाहेर काढण्यासाठी मोठ्या प्रमाणात बचावकार्य राबवलं होतं.

कसा झाला अपघात ?

कळवण डेपोची उमराणे-देवळा एसटी बस मालेगावहून धोबीघाट मेशीकडे जात होती. धोबीघाट परिसरात देश-विदेश हॉटेलजवळ एसटी आणि रिक्षामध्ये जोरदार धडक झाली. चालकाचं नियंत्रण सुटल्याने बस रिक्षावर धडकल्याची प्राथमिक माहिती आहे. ही धडक इतकी भीषण होती की, अपघातानंतर बस आणि रिक्षा ही दोन्ही वाहनं विहिरीत कोसळली. अपघात झाल्यानंतर घटनास्थळी मोठी गर्दी झाली होती.

बसची मागील काच फोडून बसमधील प्रवाशांना बाहेर काढण्यात आलं. तसेच, बस आणि रिक्षाला जेसीबीच्या सहाय्याने बाहेर काढण्यात आलं. या अपघातात 25 जणांचा नाहक बळी गेला असून 35 जण गंभीर जखमी झाले आहेत. जखमी प्रवाशांना मालेगाव देवळा येथील रुग्णालयात, तर काहींना उमराणे येथील शासकीय रुग्णालयात दाखल करण्यात आले आहे.

Nashik ST Bus Baby Rescue