पावसात कपड्यांवर चिखलाचे डाग? ‘या’ 7 घरगुती उपायांनी मिळवा झटपट स्वच्छता
पावसाळ्यात डागांपासून कपड्यांचे संरक्षण करणे अवघड असले तरी अशा घरगुती उपायांनी तुम्ही ते सहजपणे स्वच्छ करू शकता. हे उपाय केवळ सोपे नाहीत, तर स्वस्तही आहेत आणि तुमच्या कपड्यांना पुन्हा एकदा नवं रूप देऊ शकतात.
पावसाळा म्हणजे गारवा, सरींचा आनंद, आणि त्याचबरोबर अनेक अडचणीही. यापैकी एक मोठी समस्या म्हणजे कपड्यांवर लागणारे चिखलाचे डाग. शाळेत जाणारी मुले, ऑफिसला धावणारे कर्मचारी किंवा बाहेरच्या कामासाठी घराबाहेर पडणारी कोणतीही व्यक्ती सगळ्यांनाच या डागांचा त्रास होतो. हे डाग केवळ दिसायला कुरूप नसतात, तर ते काढणेही तितकेच कठीण असते. पण काळजी करू नका, तुमच्या घरातल्या काही सोप्या गोष्टींच्या वापराने तुम्ही हे डाग सहज काढू शकता.
1. आधी चिखल सुकू द्या आणि नंतर झाडा
चिखल लागल्यावर लगेच पाणी टाकू नका. त्याऐवजी डाग सुकू द्या. सुकल्यावर मऊ ब्रशने, हलक्या हाताने चिखल झाडून टाका. याने डागाची वरची थर दूर होईल.
2. थंड पाण्याचा वापर करा
सुकलेला चिखल झाडून झाल्यावर कपडे थंड पाण्याने धुवा. गरम पाणी वापरल्यास डाग अजून खोल जाऊ शकतात व निघण्यास कठीन होऊ शकते.
3. बेकिंग सोडा वापरा
एक चमचा बेकिंग सोड्यात थोडंसे पाणी घालून त्याची पेस्ट बनवा नंतर ही पेस्ट डागांवर लावा आणि 10-15 मिनिटांनी थंड पाण्याने धुवा. यामुळे डाग निघण्यास मदत होते.
4. लिंबाचा रस लावा
लिंबामध्ये असलेले सिट्रिक अॅसिड डाग साफ करण्यासाठी प्रभावी ठरते. लिंबाचा रस डागावर लावून काही वेळ ठेवा आणि नंतर कपडे धुवा.
5. पांढरा व्हिनेगर वापरा
डाग हटत नसेल तर एका कप पाण्यात 2 चमचे पांढरा व्हिनेगर मिसळा. हा घोल डागांवर लावा, थोडा वेळ ठेवा आणि नंतर धुवा. ही पेस्ट तुमच्या कपड्यातील डाग आणि दुर्गंधी दोन्ही दूर करते.
6. डिटर्जंटचा चांगला वापर करा
वर दिलेले उपाय करून झाल्यावर चांगल्या क्वालिटीच्या डिटर्जंटने कपडे धुवा किंवा वॉशिंग मशीनमध्ये टाका. याने उरलेले डागही निघून जातील.
7. नाजूक कपड्यांसाठी ड्राय क्लिनिंग करा
जर कपडे अतिशय नाजूक असतील जसे की, सिल्क किंवा उबदार ऊनी कपडे तर घरच्या घरी उपाय करण्याऐवजी ते कपडे ड्राय क्लिनिंगला द्या. यामुळे कपडे स्चच्छ होतील व कोणते नुकसानही होणार नाही.
