पाणी प्यायल्यावर लगेच टॉयलेटला जाताय? सावधान! या गंभीर आजाराचे असू शकते लक्षण

जर तुम्हाला प्रत्येक वेळी पाणी पिताना लघवी करण्याची तीव्र इच्छा होत असेल, तर यामागे केवळ हायड्रेशनचा प्रश्न नसून काही गंभीर आरोग्य समस्या असू शकते. वारंवार शौचालयात जाण्याची सवय तुमच्या दैनंदिन जीवनावर परिणाम तर करतेच, शिवाय शरीरातील संभाव्य असंतुलनाचाही इशारा देते. तज्ज्ञ डॉक्टरांच्या मते, ही समस्या सातत्याने जाणवत असेल तर ती दुर्लक्षित करू नये. पाणी पिल्यानंतर लगेच लघवी करण्याची सवय कोणत्या आजारांमुळे होऊ शकते आणि त्यावर उपाय काय आहेत, याबद्दल जाणून घेऊया.

जास्त पाण्याचे सेवन

जर तुम्ही दिवसभरात तीन लिटरपेक्षा जास्त पाणी पित असाल, तर शरीर अतिरिक्त पाणी लघवीद्वारे बाहेर टाकते. परंतु, थोडेसे पाणी प्यायल्यानंतरही लघवीची तीव्र इच्छा होत असेल, तर ही चिंतेची बाब आहे. अशा परिस्थितीत डॉक्टरांचा सल्ला घेणे आवश्यक आहे. ही छोटी वाटणारी समस्या आरोग्यावर गंभीर परिणाम करू शकते.

Video: निळ्या रंगाचा नाग? शेतकऱ्याने काढी मारली तेवढ्यात… व्हिडीओ पाहून उडेल थरकाप

कॅफेनयुक्त पदार्थांचे सेवन

चहा, कॉफी, कोल्ड ड्रिंक्स यांसारख्या पदार्थांमध्ये मूत्रवर्धक (डायुरेटिक) घटक असतात, जे लघवी निर्मितीची प्रक्रिया जलद करतात. यामुळे वारंवार शौचालयात जाण्याची गरज भासू शकते.

डॉक्टरांच्या मते संभाव्य आजार

अतिसंवेदनशील मूत्राशय (Overactive Bladder)

ही अशी अवस्था आहे ज्यामध्ये मूत्राशयाचे स्नायू अतिसंवेदनशील बनतात. यामुळे थोड्याशा लघवीमुळेही शौचालयात जाण्याची तीव्र इच्छा निर्माण होते.

मूत्रमार्गाचा संसर्ग (Urinary Tract Infection – UTI)

महिलांमध्ये याचे प्रमाण जास्त आढळते. यामुळे लघवी करताना जळजळ, वारंवार लघवी होणे आणि कधीकधी वेदना जाणवते. जर पाणी प्यायल्यानंतर सतत शौचालयात जावे लागत असेल, तर युटीआय तपासणी करणे गरजेचे आहे.

मधुमेह (Diabetes)

रक्तातील साखरेची पातळी वाढल्याने शरीर अतिरिक्त ग्लुकोज लघवीद्वारे बाहेर टाकण्याचा प्रयत्न करते, ज्यामुळे वारंवार लघवीला जावे लागते. जर तुम्हाला सतत तहान लागणे आणि थकवा जाणवत असेल, तर हे मधुमेहाचे लक्षण असू शकते.

उपाय

• पाण्याचे प्रमाण नियंत्रित ठेवा: गरजेपेक्षा जास्त पाणी पिणे टाळा आणि डॉक्टरांचा सल्ला घ्या.
• कॅफेन कमी करा: कॅफिनयुक्त पदार्थांचे सेवन मर्यादित करा.
• वैद्यकीय तपासणी: लक्षणे कायम राहिल्यास त्वरित डॉक्टरांकडे जा आणि आवश्यक तपासण्या करा, जसे की युटीआय किंवा मधुमेहाची चाचणी.
• या लक्षणांकडे वेळीच लक्ष देऊन योग्य उपचार घेतल्यास गंभीर आरोग्य समस्यांपासून बचाव होऊ शकतो.