Kangana Ranaut : कंगना रणौत चांदीच्या ग्लासमध्ये का पिते पाणी? जाणून घ्या ‘हे’ जबरदस्त फायदे
Kangana Ranaut : अभिनेत्री व खासदार कंगना रणौतची चांदीच्या ग्लासात पाणी पिण्याची सवय सध्या चर्चेत आली आहे. चांदीच्या ग्लासमध्ये पाणी पिण्याची पद्धत पूर्वीपासून प्रचलित आहे. आयुर्वेदातही चांदीला विशेष महत्त्व दिले जाते. चांदीच्या ग्लासमध्ये पाणी पिण्याचे आरोग्यदायी फायदे कोणते, जाणून घ्या.
चांदीचा वापर केवळ दागिने किंवा सजावटीच्या वस्तूंसाठी केला जात नाही, तर पूर्वीपासूनच अन्न आणि पाणी ठेवण्यासाठीही केला जातो. विशेषतः चांदीच्या ग्लासमध्ये पाणी पिण्याची पद्धत आजही अनेक घरांमध्ये पाहायला मिळते. आता अभिनेत्री व खासदार कंगना रणौतनेही तिच्या डेली रूटीनमध्ये चांदीच्या ग्लासातून पाणी पिण्याच्या सवयीबद्दल सांगितले आहे. एका पॉडकास्टमध्ये चांदीच्या ग्लासातून पाणी का पिते, असे विचारण्यात आले असता तिने त्याचा संबंध शरीरातील पित्तदोषाशी जोडला.
चांदीच्या शीतल गुणधर्मामुळे पित्त संतुलित ठेवण्यास मदत होते, असे तिने सांगितले. आयुर्वेदिक दृष्टिकोनाबरोबरच चांदीच्या अँटीबॅक्टेरियल गुणधर्मांचाही उल्लेख तज्ज्ञांनी केला आहे. चांदीच्या ग्लासमध्ये पाणी पिण्याने शरीरावर काय परिणाम होतो आणि ही पद्धत आरोग्यासाठी कितपत उपयुक्त ठरते याबाबत येथे जाणून घेऊया.
पचनक्रिया सुरळीत होण्यास मदत
चांदीच्या ग्लासमध्ये पाणी प्यायल्याने पचनक्रिया सुधारण्यास मदत होते. आयुर्वेदानुसार चांदीचा थंड गुणधर्म शरीरातील पित्त संतुलित ठेवण्यास मदत करतो. त्यामुळे अपचन, आम्लपित्त आणि पोटाशी संबंधित काही सामान्य समस्या कमी होण्यास मदत मिळू शकते.
शरीरातील अतिरिक्त उष्णता कमी होते
चांदीचा शीतल गुणधर्म शरीरातील अतिरिक्त उष्णता कमी करण्यास मदत करतो. त्यामुळे उन्हाळ्यात किंवा शरीरात उष्णता वाढल्यास चांदीच्या ग्लासात ठेवलेले पाणी पिणे फायदेशीर ठरू शकते. शरीराचे तापमान संतुलित ठेवण्यासही यामुळे मदत होते.
पाण्यातील सूक्ष्मजीवांची वाढ कमी होण्यास मदत
चांदीमध्ये अँटीमायक्रोबियल गुणधर्म असतात. त्यामुळे चांदीच्या संपर्कात असलेल्या पाण्यात काही प्रकारच्या बॅक्टेरिया आणि इतर सूक्ष्मजीवांची वाढ कमी होऊ शकते. यामुळे पाणी तुलनेने स्वच्छ ठेवण्यास मदत मिळते.
तोंडाच्या आरोग्यासाठी उपयुक्त
चांदीच्या अँटीमायक्रोबियल गुणधर्मांचा फायदा तोंडाच्या आरोग्यालाही होऊ शकतो. तोंडातील काही हानिकारक बॅक्टेरियांची वाढ कमी करण्यास मदत मिळू शकते. त्यामुळे तोंडाची स्वच्छता राखण्यास हातभार लागतो. मात्र, यासाठी नियमित ब्रशिंग आणि दातांची योग्य काळजी घेणे आवश्यक आहे.
शरीराला थंडावा मिळतो
चांदीच्या शीतल गुणधर्मामुळे शरीराला थंडावा मिळण्यास मदत होते. शरीरातील उष्णता आणि पित्त वाढल्यास चांदीच्या ग्लासमध्ये ठेवलेले पाणी आरामदायी ठरू शकते. विशेषतः उष्ण हवामानात याचा फायदा होऊ शकतो.
त्वचेच्या आरोग्यासाठीही फायदेशीर
शरीरातील पाणी आणि उष्णतेचे संतुलन त्वचेच्या आरोग्यासाठी महत्त्वाचे असते. पुरेसे पाणी प्यायल्याने शरीर हायड्रेटेड राहते. चांदीच्या ग्लासातील पाण्यामुळे मिळणारे संभाव्य अँटीमायक्रोबियल गुणधर्म आणि योग्य हायड्रेशन त्वचेच्या आरोग्याला अप्रत्यक्षपणे मदत करू शकतात.
चांदीचा ग्लास वापरताना काय काळजी घ्यावी?
पाणी पिण्यासाठी वापरला जाणारा चांदीचा ग्लास शुद्ध आणि स्वच्छ असणे आवश्यक आहे. त्यामध्ये इतर धातूंचे मिश्रण किती आहे, याकडेही लक्ष द्यावे. चांदीच्या भांड्यात आंबट किंवा अत्यंत आम्लयुक्त पदार्थ दीर्घकाळ ठेवणे टाळावे.
(डिस्क्लेमरः या लेखातील महिती उपलब्ध स्त्रोतावरून देण्यात आलेली आहे. याच्या तथ्याबद्दल आम्ही कुठलाही दावा करत नाही. लागू करण्यापूर्वी तज्ज्ञांचा सल्ला घ्यावा.)
