छगन भुजबळांच्या नाराजीच्या चर्चांवर सुनिल तटकरे यांचं स्पष्ट भाष्य; म्हणाले, ते आमचे…

राज्यसभेच्या उमेदवारी न मिळाल्याने छगन भुजबळ नाराज असल्याची चर्चा राजकीय वर्तुळात आहे. यावर राष्ट्रवादी अजित पवार गटाचे प्रदेशाध्यक्ष सुनील तटकरे यांनी प्रतिक्रिया दिली आहे. राष्ट्रवादी काँग्रेस परिवार आणि या परिवाराचे अजितदादा पवार हे प्रमुख आहेत. छगन भुजबळ साहेब देखील या परिवाराचे ज्येष्ठ घटक आहेत. त्यांच्या विधानाच्या अलीकडचा आणि पलीकडचा भाग मी पाहत नाही. तोपर्यंत यावर बोलणं योग्य नाही. पक्ष चालवताना अध्यक्ष नेतृत्व करतात हे भुजबळांना देखील मान्य आहे. छगन भुजबळ आमच्या नेत्यांसोबत पक्ष सोबत आहेत. त्यांच्या नेतृत्वातच विधानसभा निवडणुका लढवल्या जातील, असं सुनील तटकरे म्हणालेत.

सुनील तटकरेंनी घेतलं साईबाबांचं दर्शन

राष्ट्रवादी काँग्रेस प्रदेशाध्यक्ष सुनील तटकरे यांनी साईबाबांच दर्शन घेतलं. दोन दिवसीय जिल्हा दौऱ्याचा आजचा दुसरा दिवस आहे. आज शिर्डी आणि अकोले मतदारसंघात आढावा बैठक घेणार आहेत. या बैठकीला सुनील तटकरे यांच्यासह रुपाली चाकणकर देखील आढावा बैठकीत मार्गदर्शन करणार आहेत. यावेळी माध्यमांशी बोलताना सुनील तटकरे विविध मुद्द्यांवर बोलते झाले.

लोकसभेच्या निकालावर सुनील तटकरे यांची प्रतिक्रिया

नुकत्याच झालेल्या लोकसभा निवडणुकीत राष्ट्रवादी अजित पवार गटाला केवळ एका जागेवर विजय मिळवता आला. यावरही सुनील तटकरे यांनी भाष्य केलंय. लोकसभेला आम्हाला चार जागा मिळाल्या. परभणीची जागा रासपसाठी आम्ही सोडली. जागावाटप करताना सीटिंग जागेचा प्राधान्याने विचार केला जातो. आम्हाला अपेक्षित यश मिळालं नाही. मात्र याचा विधानसभा निवडणुकांवर परिणाम होईल असं मला वाटत नाही, असं सुनील तटकरे म्हणाले.

अजित पवार गटाचे नेते अमोल मिटकरी यांचं एक विधान सध्या चर्चेत आहे. यावर बोलताना भाजप अजित पवारांना टार्गेट करत नाही. काही हितशत्रू जाणीवपूर्वक अश्या बातम्या प्रसारित करताय. महायुतीत संभ्रम निर्माण करण्यासाठी अशी वक्तव्य केले जातात. अमोल मिटकरी यांनी माहिती घेऊनच कोणत्याही विषयी बोलल पाहिजे अशा सूचना मी त्यांना दिल्या आहे, असं तटकरेंनी म्हटलं.